झापा, भदौ ९ । नेपाल वितरक महासंघ कोशी प्रदेशको दोस्रो वार्षिक साधारण सभा तथा अधिवेशन यही भदौ १३ र १४ गते बिर्तामोडमा हुने भएको छ ।
मेची डिष्ट्रिव्यूटर्स एशोसिएसनको आतिथ्य र व्यवस्थापनमा नेपाल वितरक महासंघको दुई दिने कार्यक्रम बिर्तामोडको होटल सिद्धार्थमा हुन लागेको हो । भदौ १३ गते अन्तरक्रिया कार्यक्रम र १४ गते साधारण सभा तथा अधिवेशन गर्ने गरी तयारी थालिएको हो ।
कार्यक्रम सम्पन्न गर्नका लागि सुरेशकुमार अग्रवाल भद्रपुरेको संयोजकत्वमा मूल आयोजक समिति गठन गरिएको छ । मूल आयोजक समितिले बिर्तामोडमा कार्यक्रम गरी दुई दिने कार्यक्रमको व्यानर सार्वजनिक गरेको छ ।
नेपाल उद्योग वाणिज्य महसंघका केन्द्रीय सदस्य उमेश डालमियाको प्रमुख आतिथ्य एवं मेची डिष्ट्रिव्यूटर्स एशोसिएसनका अध्यक्ष राजीव श्रेष्ठ वैजुको अध्यक्षतामा भएको कार्यक्रममा बिर्तामोड उद्योग वाणिज्य संघका अध्यक्ष राजु न्यौपाने , मेची डिष्ट्रिव्यूटर्स एशोसिएसनका सल्लाहकार प्रकाश शिवाकोटीलगायतको आतिथ्यता रहेको थियो ।
मूल आयोजक समितिका संयोजक भद्रपुरेले दुई दिने कार्यक्रमको तयारीबारे जानकारी दिँदै पहिलो दिन उत्पादक र वितरकका कोशी प्रदेश स्तरीय बजार प्रतिनिधिहरुसंग अन्तरक्रिया गरिने बताए । विदेश पलायन र आर्थिक मन्दीका कारण बिक्री घट्दा आफूहरु मारमा परिरहेको बताउँदै उत्पादक कम्पनीहरुले मार्जिन बढाउनु पर्ने वितरकहरुको माग रहेको छ ।
दुई दिने कार्यक्रमको प्रमुख अतिथि नेपाल वितरक महासंघका केन्द्रीय अध्यक्ष दुर्गा गौतम रहने कार्यक्रम संयोजक भद्रपुरेले जानकारी दिए । कार्यक्रममा कोशी प्रदेशभरिका वितरकहरु र मेची डिष्ट्रिव्यूटर्स एशोसिएसनमा आवद्ध सदस्य गरी करिव दुईसय जनाको सहभागिता रहने जनाइएको छ । मेची डिष्ट्रिव्यूटर्स एशोसिएसनमा ७५ वटा डिलरहरु आवद्ध रहेको एशोसिएसनका सचिव सन्तोषकुमार श्रेष्ठ कसजुले बताए ।
