झापा, भदौ ९ । पैसा माग्दा नदिएपछि वृद्धा हजुरआमालाई खुकुरी हान्ने भद्रपुरका एक युवक करिव दुई महिनापछि पक्राउ परेका छन् ।
पक्राउ पर्नेमा भद्रपुर १० स्थित सत्रबिगे बस्ने २७ वर्षीय महेश सुबेदी रहेका छन् । उनले गत असार १२ गते बिहान ५ बजे एक्लै बस्दै आएकी आफ्नै हजुरआमा ७२ वर्षीया खिनमाया सुबेदीलाई घरमा आई पैसा माग्दा नदिएपछि रिसको आबेगमा खुकुरी प्रहार गरी घाइते बनाएका थिए ।
घटनापछि फरार रहेका सुवेदीलाई खोजतलासकै क्रममा आज साँझ ५ः३० बजे जिल्ला प्रहरी कार्यालय झापाबाट प्रहरी निरीक्षक विजय चौहानको कमाण्डमा खटिएको प्रहरी टोलीले भद्रपुर १० सत्रबिगेस्थित उनको घरबाटै पक्राउ गरेको हो । उनलाई जिल्ला प्रहरी कार्यालयमा ल्याई अनुसन्धान भइरहेको छ ।
उनीबिरुद्ध यसअघि नै ज्यान मार्ने उद्योगमा मुद्दा दर्ता भइ पक्राउ पुर्जी जारी भइसकेको डीएसपी खगेन्द्र खड्काले बताए । उनलाई अनुसन्धानको लागि म्याद थप गर्न भोलि जिल्ला अदालतमा पेश गरिने डीएसपी खड्काले जानकारी दिए ।
