झापा, भदौ १० । राष्ट्रिय प्रजातन्त्र पार्टीबाट सांसद बनेकी रोशन कार्कीले प्रधानमन्त्री केपी शर्मा ओलीले गिरीबन्धु टी–इस्टेटको जग्गा खाएको आरोप लगाएकी छन् ।
पत्रकार ऋषि धमलाको ‘जनता जान्न चाहन्छन्’ कार्यक्रममा बहसका लागि पुगेकी कार्कीले प्रधानमन्त्री ओलीलाई घुस्याहाको संज्ञा दिँदै गिरीबन्धु टी–इस्टेटको जग्गा खाएको आरोप लगाएकी हुन् । उनले प्रधानमन्त्री ओलीले देश बेचेको भन्दै विवादास्पद अभिव्यक्तिसमेत दिएकी छन्।
बहसका क्रममा एमालेका नेता देवी सुवेदीले राप्रपाको अवस्था कस्तो छ भनेर व्यङ्ग्य गर्दा उत्तरमा उनले आफूहरु देश बेचुवा नभएको बताइन्। उनले भनिन् – ‘हामी देश बेचुवा हैन, इन्डियालाई लगेर देश बेचुवा हैन, अब हेर्नुस् न उहाँले लिपुलेकलाई ल्याउन सक्नुहुन्छ फिर्ता, प्रधानमन्त्रीले ल्याउनुहुन्छ।’ तत्कालीन राजा ज्ञानेन्द्रको शासन कालमा स्थानीय सहायक विकासमन्त्री बनेकी रोशन राप्रपाबाट समानुपातिक सांसद बनेकी हुन्।
