झापा, भदौ १० । झापाको मेचीनगरमा श्रीमतीले झुन्डिएर आत्महत्या गर्दा आत्महत्या दुरुत्साहन आरोपमा श्रीमान पक्राउ परेका छन् ।
बुद्धशान्ति गाउँपालिका–३ घर भई हाल मेचीनगर वडा नं. १३ चारआली चोकस्थित सरोज भट्टराईको घरमा कोठा भाडा लिई बस्दै आएका यज्ञप्रसाद ढकालकी श्रीमती ३० वर्षीया कबिता चिमरिया ढकालले आइतवार बिहान ११ बजे शौचालयको बलोमा सलको पासो लगाई आत्महत्या गरेकी थिइन् ।
घटनाबारे प्रहरी चौकी चारआलीमा जानकारी प्राप्त हुनासाथ प्रहरी नायव निरीक्षक कुमार खड्काको कमाण्डमा टोली खटिएर घटनास्थल सुरक्षित राखेको थियो ।थप अनुसन्धान तथा कानुनी प्रकृयाको लागि इलाका प्रहरी कार्यालय धुलाबारीबाट प्रहरी निरीक्षक पाण्डवकुमार राजवंशीको कमाण्डमा टोली खटिएको थियो ।
सोही दिन दिउँसो २ बजे प्रहरीले सम्पूर्ण कानुनी प्रकृया पुरा गरी शव पोस्टमार्टमको लागि प्रादेशिक अस्पताल भद्रपुर पठाएको थियो । माइती पक्षले श्रीमान यज्ञप्रसादकै कारण कबिताले आत्महत्या गरेको भन्दै प्रहरीमा आत्महत्या दुरुत्साहन सम्बन्धी जाहेरी दिएका छन् । माइती पक्षले जाहेरी दिएपछि श्रीमान यज्ञप्रसादलाई हिजो पक्राउ गरिएको जिल्ला प्रहरी कार्यालयका सूचना अधिकारी डीएसपी खगेन्द्र खड्काले बताए । अदालतबाट पाँच दिनको म्याद थप गरी उनीमाथि थप अनुसन्धान भइरहेको डीएसपी खड्काले जानकारी दिए ।
घटना हुनुभन्दा अगाडि सोही दिन बिहान यज्ञप्रसादले मादक पदार्थ सेवन गरी कवितामाथि आज जे पनि हुनसक्छ भनेर माइती पक्षलाई धम्क्याएको बताइएको छ ।
