झापा, भदौ १३ । शुष्मा काष्ठ उद्योग बिर्तामोडका संचालक राजु राजवंशी( सन्तोष)संग ‘घुस’ माग्दै अनावश्यक दुःख दिने सशस्त्र प्रहरीमाथि छानविन गरिने भएको छ ।
व्यवसायी राजवंशीसंग भएको घटनाबारे ध्यानाकर्षण गराएपछि प्रमुख जिल्ला अधिकारी गोपालकुमार अधिकारीले त्यस विषयमा छानविन गरिने बताएका हुन् । सशस्त्र प्रहरी बल, नेपाल नं २ गण हे.क्वा. झापाका सशस्त्र प्रहरी उपरीक्षक तुलबहादुर भण्डारी र डिभिजन वन कार्यालय झापाका प्रमुख भरतबाबु श्रेष्ठलाई बोलाएर सो घटनाका बारेमा छानविन गरिने उनले बताए । सुरक्षा अधिकारीहरुले व्यवसायीलाई हतोत्साही गर्न निमिल्ने बताउँदै घटनाको वास्तविकता अध्ययन गर्ने जानकारी दिए । प्रहरी नायव उपरीक्षक सुमन पोखरेल र टिमाई चेक पोष्टका सशस्त्र प्रहरी नायव निरीक्षक केदार श्रेष्ठले अनावश्यक रुपमा दुःख दिएको भन्दै प्रमुख जिल्ला अधिकारीको ध्यानाकर्षण गराइएको हो झापाका फर्निचर व्यवसायी, राजनीतिक दलका प्रतिनिधि र बिर्तामोडका व्यवसायीले प्रमुख जिल्ला अधिकारीको ध्यानाकर्षण गराएका थिए ।
काष्ठ उद्योगका सञ्चालक राजवंशीले बुद्धशान्ति गाउँपालिका–५ बाट काठ ल्याउने क्रममा सशस्त्र प्रहरीको टिमाई चेक पोष्टका सशस्त्र प्रहरी नायव निरीक्षक श्रेष्ठले अनावश्यक रुपमा घुस मागेको , नदिँदा काठसहित मानिसलाई सशस्त्र प्रहरी वल नेपाल नम्वर २ गण हे.क्वा. झापा पु¥याएको र काठ राजश्व कार्यालय इटहरीलाई बुझाएको ध्यानाकर्षणपत्रमा उल्लेख छ ।
डिभिजन वन कार्यालय झापाले दिएको इजाजत अनुसार शुष्मा काष्ठ उद्योग बिर्तामोड–४ले वुद्धशान्ति गाउँपालिका ५ स्थित नारायणप्रसाद भट्टराईको नाममा दर्ता रहेको कित्ता नम्वर २९५ र वुद्धशान्ति गाउँपालिका–५स्थित कित्ता नम्वर ६८६९मा रहेको निजी वनबाट उत्पादित सेतो सिरिस, खमारी सिमललगायत प्रजातिका काठ खरिद गरेको र सो काठ ल्याउने क्रममा सशस्त्र प्रहरीले पक्राउ गर्दै २५ हजार रुपैयाँ माग गरेको उद्योगका सञ्चालक राजवंशीले बताए । आवश्यक कागजात हुँदाहुँदै आफूले प्रहरीलाई पैसा नदिएकै कारण काठसहित गाडी नियन्त्रणमा लिएर राजश्व कार्यालय पठाएको र राजश्व कार्यालयले समेत प्रहरी रिपोर्टलाई आधार मान्दै ७० हजार रुपैयाँ जरिवाना गरेको प्रमुख जिल्ला अधिकारी अधिकारी समक्ष राजवंशीले बताए ।
हिजै राजवंशीले बिर्तामोडमा पत्रकार सम्मेलनको आयोजना गर्दै घटना सार्वजनिक गरेका छन् । बिर्तामोड उद्योग वाणिज्य संघको कार्यालयमा आयोजित पत्रकार सम्मेलनमा आफूलाई राजवंशी भएकै कारण प्रहरीले विभेद गरेको र प्रहरीले मागेको जति रकम नदिँदा अनावश्यक रुपमा दुःख दिएको उनको भनाइ थियो ।
