बिर्तामोड,भदौ १३ ।नेपाली राष्ट्रिय बाजाको रुपमा परिचित नौमति बाजाको सेवा अब गोर्खा टेलरिङ्बाट उपलब्ध हुने भएको छ ।
झापाको बिर्तामोडमा संचालित गोर्खा टेलरिङ् स्थापनाको दशौं वार्षिकोत्सवको अवसरमा नौमति बाजाको सेवा उपलब्ध गराइएको गोर्खा फाउण्डेशनका अध्यक्ष तथा टेलरिङ्का संचालक वीरु दर्नालले बताए ।
नेपाली समाजमा धार्मिक , सांस्कृतिक , चाडपर्व , रोपाइँ , व्रतबन्ध , जात्रा एवम् विवाह कार्यक्रममा प्रयोग गरिदै आएको नेपाली मौलिक संस्कृतिको धरोहरको रुपमा नौमति बाजालाई लिने गरिएको छ ।
नेपाली संस्कृतिको जगेर्ना र सम्वर्द्धन गर्न परापूर्वकालदेखि पंचे बाजा तथा नौमति बाजाको प्रयोग गरिदै आएको छ । यस बाजाको सुरुवातमा परियार जातिका पुरुषले मात्र बजाउँदै आएकोमा पछिल्लो समय पूर्वमा अन्य जातिका विशेषगरी महिलाहरुले ब्यवसायिक रुपमै बजाउन थालेको पाइएको छ । त्यस्तै मध्य तथा पश्चिम नेपालमा भने परियार , जनजाति महिला एवम् खस आर्यहरुले समेत बजाउँदै आएका छन् ।
पूर्वी नेपाली समाजमा अत्यधिक रुचाइएको नेपाली मौलिक बाजा नौमतिको माग र आवश्यकता बढ्दै गएको र यसलाई समय अनुकूल थप ब्यवस्थित गरिनु आवश्यक छ । सोही अनुसार यसलाई थप लोकप्रिय बनाएर सम्पूर्ण पारखीहरुको मागलाई मध्यनजर गर्दै यो पेशालाई थप सम्मानित र ब्यवसायिक बनाउन गोर्खा टेलरिङ्ले यस वर्षदेखि नौमति बाजाको सेवा उपलब्ध गराउन सुरु गरेको संचालक दर्नालले बताए । पूर्वेली समाज देखिएको नौमति बाजाको मागलाई पुरा गर्ने उद्धेश्यले यो सेवाको प्रारम्भ गरेको दर्नालले बताए ।
गोर्खा टेलरिङ्का ग्राहकलाई एकै ठाउँबाट आवश्यक सेवा दिने एक अर्को उद्धेश्य रहेकोले आफ्ना ग्राहकहरुलाई थप सेवा पुग्नेमा विश्वस्त रहेको बताइएको छ ।
नौ वटा बाजाहरुको सामूहिक बाजा हो नौमति । यो पंचे बाजाको ठुलो रुप हो । यसमा दमाहा , सहनाई , कर्नाल , नरसिंहा , झ्याली ( झ्याम्टा ) , ट्याम्को , ढोलक हुन्छन् जसमा सहनाई र नरसिंहा दुई–दुई वटा हुन्छन् । यसलाई बजाउन नौ जना प्राबिधिक आवश्यक पर्ने बाजा समूहका संयोजक नरेन्द्र दर्नालले बताए ।
