झापा, भदौ १३ । एक वर्ष दुई महिनाअघि छोटा हात्तीको ठक्करबाट घाइते भएका झापा कनकाई नगरपालिका वडा नम्बर ३ बस्ने ४५ वर्षीय भिष्म खतिवडाको आज बिहान मृत्यु भएको छ ।
उनले बीएण्डसी अस्पताल बिर्तामोडमा उपचार गराई घरमै रहेर औषधी सेवन गरिरहेका थिए । बेला–बेलामा फलोअपमा अस्पताल जाँदै गरेकोमा आज बिहान १० बजे खतिवडाको मृत्यु भएको जिल्ला ट्राफिक प्रहरी कार्यालयले जनाएको छ ।
२०८१ असार १७ गते राति ८ः३० बजे कनकाई नगरपालिका वडा नम्बर ३ माछापुच्छ्र्रे बैङ्क अगाडी पूर्वपश्चिम राजमार्गमा दमकबाट सुरुङ्गातर्फ आउँदै गरेको मे १च ६१७४ नम्बरको छोटा हात्तीले बिपरित दिशाबाट जाँदै गरेको मे ८ प १५३५ नम्बरको मोटरसाइकललाई ठक्कर दिएको थियो । दुर्घटनामा मोटरसाइकल चालक कनकाई ३ बस्ने खतिवडा गम्भीर घाइते भएका थिए । सोही मोटरसाइकलमा पछाडी सवार कन्काई ४ बस्ने बर्ष ५२ वर्षीय दिपक सेढाई पनि घाइते भएका थिए । सेढाई उपचारपछि निको भएका थिए भने खतिवडा उपचारमै रहेका थिए ।
छोटा हात्ती र छोटा हात्ती चालक बिर्तामोड नगरपालिका वडा नम्बर १० बस्ने ३१ वर्षीय संजोग खवासलाई इलाका प्रहरी कार्यालय सुरुङ्गाले नियन्त्रणमा लिएको थियो । छोटा हात्ती चालक खवास थुनामै रहेको प्रहरीले जनाएको छ ।
