झापा, भदौ १४ । बिषालु च्याउ खाएर झापा गौरीगञ्जका एकै परिवारका तीनजना विरामी परेका छन् ।
आज दिउँसो ३ बजे गौरीगञ्ज गाउँपालिका ३ ठेकीटोला बस्ने ६२ वर्षीय रामचन्द्र मण्डल, उनकी श्रीमती ५२ वर्षीया शंकरी मण्डल र नाति १३ वर्षीय निलकुमार मण्डल बिषालु च्याउ खाएर विरामी परेका हुन् । उनीहरुले खेतबारीको च्याउ ल्याएर पकाएर खाएका थिए ।
विरामी भएका उनीहरुलाई उपचारको लागि गौरीगञ्ज आधारभूत अस्पताल गौरीगञ्जमा सामान्य उपचारपश्चात् थप उपचारको लागि दमक अस्पताल दमक पठाइएको छ । बोल्न सक्ने तीनैजनाको अवस्था मध्यम रहेको प्रहरीले जनाएको छ ।
