झापा, भदौ १४ । झापा क्षेत्र नं ३ मा एमालेसंग सहयोग लिएर दुईपटक निर्वाचन जितेका राष्ट्रिय प्रजातन्त्र पार्टीका अध्यक्ष राजेन्द्र लिङ्देनले प्रधानमन्त्री एवं एमाले अध्यक्ष केपी शर्मा ओलीलाई प्रत्यक्ष निर्वाचित कार्यकारी प्रधानमन्त्रीको व्यवस्था गरेर आफूसँग प्रतिस्पर्धा गर्न चुनौती दिएका छन्।
शनिबार झापाको बिर्तामोडमा आयोजित राप्रपाको ११ औं जिल्ला अधिवेशनलाई संबोधन गर्दै लिङ्देनले ओलीलाई यस्तो चुनौती दिएका हुन्।
उनले ओलीलाई जनतामाझ निकै लोकप्रिय ठान्छन् भने संविधान संशोधन गरेर प्रत्यक्ष निर्वाचित प्रधानमन्त्रीका रूपमा प्रतिस्पर्धा गर्न आग्रह गरे।
यसका साथै, उनले आवश्यक परे झापा क्षेत्र नम्बर ५ बाट समेत निर्वाचन लड्न तयार रहेको चेतावनी दिए ।
प्रधानमन्त्री ओलीले आफ्ना कार्यकर्तालाई ‘लिङ्देनले झापामा कहाँबाट चुनाव जित्छन्, हेरौंला’ भनेर भनेको कुरालाई स्मरण गर्दै उनले सांसद बन्नु वा नबन्नु भन्दा माथि उठेर आफू राजनीतिमा लागेको बताए।
उनले भने, ’म सांसद त के, बाँकी जीवन एउटा वडाको सदस्य नभई मर्न तयार छु तर यो भ्रष्ट व्यवस्थाको विरुद्ध उभिन्छु भनेर आएको हुँ।’
लिङ्देनले आफ्नो मुख्य उद्देश्य प्रधानमन्त्री, मन्त्री वा सांसद बन्नु नभएको र केवल एउटा सांसद जित्नु मात्रै आफ्नो लक्ष्य नरहेको स्पष्ट पारे।
उनले सन् २०८४ को निर्वाचनमा प्रत्यक्ष निर्वाचित कार्यकारी प्रधानमन्त्रीको व्यवस्थासहित प्रतिस्पर्धा गर्न प्रधानमन्त्रीलाई चुनौती दिए।
अधिवेशनबाट राप्रपाको जिल्ला अध्यक्षमा पुनः केशवप्रसाद ओझा चयन भएका छन् । उनी दोस्रो कार्यकालका लागि झापाको अध्यक्षमा चयन भएका हुन् ।
यसअघि उनी दुईपटक जिल्ला सचिव भएका थिए । राप्रपाको विधानमा कुनै पनि पदमा दुई कार्यकाल रहन पाउने व्यवस्था गरिएको छ । बिर्तामोडस्थित अतिथि सदनमा भएको अधिवेशनले ओझाको अध्यक्षतामा ३७ सदस्यीय जिल्ला समिति घोषणा गरेको छ । वाँकी १२ जना सदस्य अध्यक्षले मनोनयन गर्ने विधानतः व्यवस्था भएकाले उनीहरुलाई पछि चयन गरिने बताइएको छ ।
अध्यक्ष ओझालाई पार्टीका केन्द्रीय अध्यक्ष लिङ्देनले प्रमाणपत्र प्रदान गरेका थिए । उनीसंगै जिल्लाका पदाधिकारी, पालिका अध्यक्षसहितका पदाधिकारी र क्षेत्रीय अध्यक्षसहितका पदाधिकारीलाई समेत प्रमाणपत्र बितरण गरिएको थियो ।
अध्यक्ष ओझाको नेतृत्वमा निमसरी राजवंशी, विष्णु गिरी, दिपेश राई, टीकाराम (चक्र) फुयाल, राजकुमार योङ्या, लक्ष्मीदेवी मैनाली, अस्मिता खरेल, सूर्य खतिवडा, सीता लम्साल, युवराज लुइटेल, प्रकाश वस्नेत, सेलिना राई , विष्णु पौडेल सदस्य रहेका छन् ।
यसैगरी टिकाराम बराल, बाबुराम पराजुली, शिवबहादुर कटुवाल, नन्दलाल राजवंशी, इन्दिरा रिजाल, छविलाल लम्साल , शंकरप्रसाद रिजाल, रामकुमार लिङ्खिम, कुलबहादुर(कुमार) थापा, प्रविण रिाजाल, संगीता रौनियार, पशुपति पोखरेल, खेम कार्की सत्यनारायण यादव, शारदा वुढाथोकी, हर्क तामाङ, प्रेम फुयाल, गंगादेवी दुलाल, चित्रा श्रेष्ठ, देवीबहादुर थापा, खगेन्द्र पाण्डे, भीमवहादुर वस्नेत, बालिका रायमाझी, कृष्णमाया थापा , राम न्यौपाने रहेका छन् ।
पालिका अध्यक्षसहितका पदाधिकारी यसअघि नै सम्पन्न अधिवेशनले चयन गरेकाले उनीहरुलाई समेत प्रमाणपत्र बितरण गरिएको छ । कार्यक्रमका प्रमुख अतिथि रहेका अध्यक्ष लिङ्देनले १५ वटै पालिकाका अध्यक्षहरुलाई प्रमाणपत्र र नवप्रवेशीहरुलाई सदस्यता प्रदान गरेका थिए ।
अध्यक्ष लिङ्देनले मेचीनगर अध्यक्ष चन्द्र निरौला, बुद्धशान्ति अध्यक्ष गणेशप्रसाद खरेल, अर्जुनधारा अध्यक्ष हर्कजंग लिम्बू, बिर्तामोड अध्यक्ष लक्ष्मीप्रसाद गौतम, कनकाई अध्यक्ष गोपाल चुडाल, शिवसताक्षी अध्यक्ष मणिप्रसाद खड्कालाई प्रमाणपत्र प्रदान गरेका थिए ।
त्यस्तै कमल गाउँपालिका अध्यक्ष खड्गबहादुर श्रेष्ठ, दमक अध्यक्ष हेम सुवेदी, गौरादह अध्यक्ष शान्तिराम पौडेल, गौरीगञ्ज अध्यक्ष नन्दु थापा, झापा गाउँपालिका अध्यक्ष प्रेम प्रसाईलाई प्रमाणपत्र वितरण गरेका थिए ।
त्यस्तै बाह्रदशी अध्यक्ष पीवी कटुवाल, हल्दिवारी अध्यक्ष एकराज रानामगर, कचनकवल अध्यक्ष लक्ष्मीनारायण यादव, भद्रपुर अध्यक्ष राजकुमार राईलाई पनि प्रमाणपत्र वितरण गरिएको थियो ।
