झापा, भदौ १४ । खाना खानुअघिको मन्त्र उच्चारण गर्दै अप्सनी हालेको भिडियोले सामाजिक सञ्जालमा एकै सातामा १ करोडभन्दा बढी दर्शकको ध्यान खिचेको छ।
सो भिडियोका कारण चर्चामा आएका बाल कलाकार हुन् झापाको बिर्तामोड–२ निवासी आशुतोष भट्टराई। साधारण तर प्रभावशाली प्रस्तुतिले उनी छोटो समयमा असंख्य दर्शकको मन मुटुमा बस्न सफल भएका छन्।
क्षितिज नाट्य प्रतिष्ठान झापासँग सम्बद्ध आशुतोष हाल बिर्तामोड–२ स्थित इकम स्कुलमा कक्षा २ मा अध्ययनरत छन्। उनी प्रथम मिस मेची तथा मिस ग्राण्ड झापा २०१६ की विजेता र हाल स्वास्थ्यकर्मीको पेशामा रहेकी आमा समिक्षा खतिवडा र क्षितिज नाट्य प्रतिष्ठान झापाका कार्यकारी निर्देशक पिता राजकुमार भट्टराईका सुपुत्र हुन्। साथै उनी झापा नाटक घरका परिकल्पनाकार माधब कल्पितका नाति पनि हुन्।
आशुतोषको जन्म नाट्यकला मन्दिरमै भएको हो। यस कारण उनले बाल्यकालदेखि नै कला–संस्कृतिको वातावरणमा हुर्कने अवसर पाए। नाटक हेर्ने अभिनय गर्ने संवाद सिक्ने र रंगमञ्चको जीवन नजिकबाट बुझ्ने मौका बाल्यकालमै मिलेको हुँदा उनीमा सानैदेखि प्रतिभा पलाएको हो। अहिले उनी हिन्दु धर्मशास्त्रका श्लोक र मन्त्र सुने लगत्तै सहजै कण्ठ गर्न सक्छन्। श्लोक मात्र होइन ती शिक्षालाई दैनिकीमा उतार्ने प्रयास गर्ने क्षमताका कारण उनी दर्शकको मनमा अझ प्रिय बनेका छन्।
उनकी आमा समिक्षा खतिवडाको भनाइमा आशुतोष बहुआयामिक प्रतिभा भएका छन्। गायन अभिनय र नृत्यमा उनी समान रूपमा सक्षम छन् भने आध्यात्मिक विधा त उनको विशेष पहिचान बनेको छ। समिक्षा भन्छिन् आशुतोषको क्षमताबाट न केवल हाम्रो परिवार बरु भविष्यका पुस्ता पनि धेरै कुरा सिक्ने छन्।
क्षितिज नाट्य प्रतिष्ठानका प्रमुख माधब कल्पितका अनुसार आशुतोष असाधारण सम्भावना बोकेर आएका प्रतिभा हुन्। उनका अनुसार आशुतोषले सानै उमेरमै कला र संस्कृति मात्र होइन धर्म र आध्यात्मिकताको महत्व पनि समाजलाई सिकाइरहेका छन्।
करोडौं दर्शकले छोटो समयमा प्रेम र आशीर्वाद दिएको आशुतोष अहिले सामाजिक सञ्जालमा बाल प्रतिभाको परिचित नाम बनेका छन्। उनी भविष्यमा अभिनय गायन नृत्य तथा आध्यात्मिक क्षेत्रमा अझ प्रगति गर्ने अपेक्षा गरिएको छ। पारिवारिक पृष्ठभूमि नाटक संस्कृतिको वातावरण र व्यक्तिगत लगनशीलताले उनलाई नयाँ पुस्ताको प्रेरणादायी व्यक्तित्वको रूपमा अघि ल्याउने विश्वास परिवारको रहेको छ।
