झापा, भदौ १५ । निक्षेपकर्ताहरुको लाखौं निक्षेप फिर्ता नगर्ने बिर्तामोडको स्वर्गिक बचत तथा ऋण सहकारी संस्थामाथि उजुरी परेको छ ।
बिर्तामोड ५ को पाथिभरा टोलमा रहेको सो सहकारी संस्थाले बचत फिर्ता नगरेको भन्दै बिर्तामोड ७ का उर्मिला राई , अनिता श्रेष्ठ र धनमान वाङ्देलले इलाका प्रहरी कार्यालय बिर्तामोडमा उजुरी दिएका हुन् ।
दुईवटा खातामा रहेको आफ्नो १ लाख १० हजार ८०० रुपैयाँ बचत फिर्ता नदिएको उर्मिला राईले बताईन् । अन्य धेरै सदस्यहरुको लाखौं बचत फिर्ता नगरेको बताइएको छ । कार्यालय बन्द गरी संस्थाका पदाधिकारी र कर्मचारीहरु भागेर हिड्ने गरेको बिर्तामोड ७ का वडाध्यक्ष अविरल कृष्ण खरेलले बताए । प्रहरीले पक्राउ गरी कार्वाही गर्न खोज्दा अध्यक्ष टेकबहादुर भट्टराई नभेटिएको वडाध्यक्ष खरेलले जानकारी दिए ।
उता सहकारीका अध्यक्ष भट्टराईले अहिलेको प्रतिकुल परिस्थितिका कारण बचत फिर्ता गर्न अप्ठ्यारो परिरहेको बताए । उनले क्रमिकरुपमा सबैजनाको अलिअलि गर्दै बचत फिर्ता गरिरहेको जानकारी दिए ।
