झापा , कात्तिक १७ । ताप्लेजुङको फुङलिङमा बोलेरो गाडीमा ओट लगाउने क्रममा चक्काले किचेर चालक घाइते भएका छन् ।
हिजो साँझ ५;४५ बजे फुङलिङ –११ काफ्लेपाटीमा सदरमुकामबाट काफ्लेपाटीतर्फ जाँदै गरेको मे१ज २३२४ नं को बोलेरो गाडीको सापट भाच्चिएपछि चालक गाडीबाट निस्किएर ओट लगाउने क्रममा गाडीको चक्काले चालकलाई किचेको हो । बोलेरो चालक फिदिम –१३ बस्ने ३३ वर्षीय उमेश राई घाइते भई उनलाई उपचारको लागि जिल्ला अस्पताल ताप्लेजुङमा लगिएको छ ।
त्यस्तै सो गाडीमा सवार मोरङ उर्लाबारी –४ बस्ने मन्जु न्यौपानेका छोरा बर्ष ११ का अंकित न्यौपाने सामान्य घाइते भएका छन् । गाडीमा चालकसहित जम्मा ११ जना सवार रहेका थिए । ९ जना सकुशल रहेको प्रहरीले जनाएको छ ।
