झापा,कात्तिक १७ । नेपाली कांग्रेसको केन्द्रीय कार्यालयमा तालाबन्दी गर्नेहरूले नियमित महाधिवेशनको वातावरण निर्माण गर्न नसक्ने कार्यवाहक सभापतिसहितका पदाधिकारीले तत्काल नैतिकताका आधारमा राजीनामा दिनुपर्ने माग गरेका छन् ।
मंसिरमा पार्टीको १५ औँ महाधिवेशनको मिति तोक्न माग गर्दै आइतबार केन्द्रीय कार्यालयको मूल गेटमा तालाबन्दी गरेका ४० वर्ष मुनिका युवा कार्यकर्ताहरूले क्रियाशील सदस्यता नवीकरण र वितरणको काम गर्न नसक्ने महामन्त्री गगन थापाले तत्काल राजीनामा दिन माग गरेको तालाबन्दी गर्ने कार्यको नेतृत्व गरेका युवा नेता शिव रिमालले जानकारी दिए ।
‘मंसिरमा नियमित महाधिवेशनको वातावरण निर्माण गर्न नसक्ने पदाधिकारी र क्रियाशील सदस्यता वितरण र नवीकरणका लागि दिएको जिम्मेवारी पूरा नगर्ने महामन्त्री गगन थापाले राजीनामा दिनुपर्ने हाम्रो माग छ,’ रिमालले भने, ‘त्यो माग पूरा नहुँदासम्म तालाबन्दी खुल्दैन ।’
उनीहरूले १५ औँ महाधिवेशनको कार्यतालिका तत्काल सार्वजनिक गर्न, ४० वर्ष मुनिका युवाहरूको पार्टीका हरेक निकायमा ४० प्रतिशत हिस्सा सुनिश्चित गर्न, क्रियाशील सदस्यता वितरण एवं नवीकरणको प्रगति विवरण सार्वजनिक गरी पार्टीको वेबसाइटमा राख्नुपर्ने माग राखेका अर्का युवा नेता भुवन भट्टले जानकारी दिए ।
