झापा, कात्तिक १७ । भर्खरै सरुवा भएर आएका झापाका प्रमुख जिल्ला अधिकारी शिवराम गेलालले जिल्लामा देखिएको लागूऔषधको समस्यालाई निरुत्साहित गर्न कडा कदम चाल्ने बताएका छन् ।
तत्कालीन प्रमुख जिल्ला अधिकारी गोपालकुमार अधिकारीको जिल्ला प्रशासन कार्यालय काभ्रेपलाञ्चोकमा सरुवा भएपछि जिल्ला प्रशासन कार्यालय धनकुटाबाट तीनदिन अघिमात्र झापाको कमाण्ड सम्हाल्न आइपुगेका गेलालले सोमबार झापाका सञ्चारकर्मीहरुसँगको परिचयात्मक कार्यक्रममा बोल्दैं झापा जिल्लामा लागूपदार्थ दुर्व्यसन र अवैध कारोबारका घटनामा बृद्धि भएको खवर पाएको बताए । उनले आफूले झापाको कमाण्ड सम्हालेलगत्तै त्यसविरुद्ध कडा कदम चाल्ने प्रतिवद्धता व्यक्त गरे । जिल्ला प्रशासन कार्यालय झापाको मुख्य प्राथमिकतामा लागूपदार्थ नियन्त्रण रहेको प्रष्ट पार्दै उनले यसले समाजमा सिर्जना गर्न सक्ने आपराधिक गतिविधि र हिंसात्मक वातावरणलाई रोक्न प्रशासन तयार रहेको विचार राखे ।
झापा जिल्लाका सुरक्षा निकायले समेत निगरानी र नियन्त्रणका अभियानलाई तीव्र बनाएको भन्दैं प्रजिअ गेलालले यसका लागि थप सरकारी र गैरसरकारी संघ संस्था, नागरिक समाज र सञ्चारकर्मीहरुको पनि साथ सहयोगको आवश्यकता औल्याएका थिए ।
भदौ २३—२४ गतेको जेनजी प्रदर्शनका क्रममा भएका अराजक गतिविधिले प्रहरीको मनोबल खस्किएको छ । नागरिकको शान्ति सुरक्षाको जिम्मेवारी लिने प्रहरीको मनोबल फर्काउन कार्यक्रममा सहभागी सञ्चारकर्मीहरूले पछिल्लो घटनाक्रम, जेनजी आन्दोलनपछि देखिएका सुरक्षासम्बन्धी चासो र प्रशासनको भूमिकाबारे प्रश्न राखेका थिए ।
प्रमुख जिल्ला अधिकारी गेलालले पछिल्लो समय बढ्दो असुरक्षा र जेनजी आन्दोलनपछि देखिएका घटनाक्रमलाई प्रशासनले गम्भीर रुपमा लिएको बताए । उनले सुरक्षा व्यवस्था सुदृढ बनाउन प्रशासन पूर्ण सक्रिय रहेको विश्वास दिलाए । प्रजिअ गेलालले सरोकारवालाको सुझावलाई गम्भीरताका साथ कार्यान्वयनमा ल्याइने बताउँदै जिल्लाको शान्ति, सुरक्षा र सुशासनका लागि सबैको सहकार्य अपरिहार्य रहेको उल्लेख गरे ।
कार्यक्रममा सहभागी सञ्चारकर्मीहरूले जिल्लामा कानूनी व्यवस्था सुदृढीकरण, सवारी सुरक्षा, रात्री गस्ती र युवाबीच बढ्दो लागूपदार्थ सेवन नियन्त्रणलगायत विभिन्न सुझाव दिएका थिए । गृह मन्त्रालयले आइतबार विभिन्न जिल्लाका प्रमुख जिल्ला अधिकारीहरूको सरुवा तथा पदस्थापन गरेको थियो ।
