झापा, कात्तिक १८ । जनही १० हजारका दरले धरौटी तिरेर बिर्तामोडका ९ जना जुवाडे छुटेका छन् ।
हिजो जिल्ला प्रशासन कार्यालय झापामा जनही १० हजारका दरले धरौटी तिरेर उनीहरु छुटेको सहायक प्रमुख जिल्ला अधिकारी तेजप्रकाश प्रसाईले बताए । प्रहरीले अनुसन्धानका लागि पाँच दिनको म्याद लिएकोमा उनीहरु चार दिनमा रिहा भएका हुन् । पक्राउ परेका राजनीतिक दलका कार्यकर्ताहरुलाई छुटाउन नेताहरुले निकै कसरत गरेका थिए ।
शुक्रवार बिहानको राति १ः४५ बजे बिर्तामोड –४ पश्चिम स्टेन्ड छेउमा डेरा लिई बस्ने बाह्रदशी ४ का २९ वर्षीय राजकुमार साहको कोठामा तास खेल्दै गरेका ९ जना जुवाडेहरु पक्राउ परेका थिए । पक्राउ पर्नेहरुमा बिर्तामोड २ बस्ने बर्ष ३८ का रतन राजवंशी , सोही ठाउँ बस्ने बर्ष २६ का किशोर पराजुली , बर्ष ४३ का उत्तम शिवाकोटी , बर्ष ४३ का राजन थापा ,बिर्तामोड ३ बस्ने बर्ष ४० का डम्बर बस्नेत , सोही ठाउँ बस्ने बर्ष ४० का दिवाकर प्रसाई , बिर्तामोड ५ बस्ने बर्ष ३६ का राजेन्द्र चौधरी , बाह्रदशी ४ बस्ने बर्ष २९ का राजुकुमार साह र मेचीनगर २ बस्ने बर्ष २८ का नारायण पराजुली रहेका रहेका थिए ।
तास खेलिरहेको भन्ने गोप्य सूचनाको आधारमा इलाका प्रहरी कार्यालय अनारमनीबाट खटिएको प्रहरी टोलीले उनीहरुलाई पक्राउ गरेको थियो । उनीहरुबाट नगद रु ७५ हजार ६०० र नखोलेको सिलप्याक तास ७ बुङ, खोलेको १ बुङ तास बरामद भएको थियो ।
