झापा,कात्तिक २४ । राष्ट्रिय स्वतन्त्र पार्टी (रास्वपा)ले आगामी फागुन २१ गते हुने प्रतिनिधिसभा निर्वाचनको समानुपातिकतर्फको उम्मेदवार आह्वानसँगै छनोट प्रक्रिया अगाडि बढाएको छ ।
कात्तिक २१ र २२ गते चितवनको सौराहामा सम्पन्न केन्द्रीय समितिको विस्तारित बैठकले सहमहामन्त्री विपिनकुमार आचार्यले प्रस्तुत गरेको उम्मेदवार छनोट रुपरेखामा आधारित भएर उम्मेदवारी आह्वान गरेको थियो । उम्मेदवार छनोट कार्यतालिका केही दिनमा सार्वजनिक गरिने आचार्यले जानकारी दिए ।
आफूहरूले बनाएको उम्मेदवार छनोट प्रक्रियाले गलत व्यक्ति देश सञ्चालनमा पुग्ने अवस्था निरुत्साहित हुने उनले विश्वास व्यक्त गरे ।
‘हामीले प्रशासनमा सामान्य कर्मचारी छनोट गर्दा विभिन्न मापदण्ड बनाएर छनोट गर्छौँ भने देश सञ्चालन गर्न जाने व्यक्ति छनोट मापदण्ड बनाउनैपर्छ’, उनले भने, ‘पुराना पार्टीहरूले मापदण्डमा ध्यान नदिँदा देशको अवस्था यस्तो भएको हो । हामीले बनाएको उम्मेदवार छनोट मापदण्डले गलत व्यक्ति चुनिने कुरा निरुत्साहित हुने विश्वास लिएका छौँ ।’
उनका अनुसार उम्मेदवार छनोटका मापदण्ड स्पष्ट र मापनयोग्य हुनेछन् । यी मापदण्डहरूलाई निर्वाचन प्रणालीका आधारमा कारक मूल्याङ्कन विधि (फ्याक्टर रेटिङ मेथड) अनुसार अंकभार दिइनेछ र प्रत्येक मापदण्डका सूचकहरूमा प्राप्ताङ्कको समष्टिले उम्मेदवार छनोट गरिनेछ । केन्द्रीय समितिले अनुमोदन गरेको विशेष अवस्थामा बाहेक उम्मेदवार क्लब, लिडरसिप एकेडेमी, पोलिटिकल प्रोक्सिमिटी, समावेशिता र प्रारम्भिक निर्वाचन मूल मापदण्डका रूपमा अनिवार्य उनले स्पष्ट पारे ।
प्रतिनिधिसभा सदस्यको निर्वाचनका लागि उम्मेदवार छनोट प्रक्रियामा सहभागी हुन इच्छुक पार्टी सदस्यहरूले उम्मेदवार क्लबमा सहभागी हुनुपर्नेछ । उम्मेदवार क्लबका लागि आवेदन, योग्यता परीक्षण, अभिलेखीकरण आदि व्यवस्था उम्मेदवार छनोट प्रक्रिया र विधान बमोजिम हुनेछ । उम्मेदवार क्लबमा आवेदन दिन अनलाइन र अफलाइन दुवै माध्यम उपलब्ध हुने आचार्यले बताए । रास्वपाबाट उम्मेदवार बन्ने आकांक्षीले आवेदन शुल्क पचास हजार तिर्नुपर्ने बताए ।
‘हाम्रो पार्टीको तर्फबाट उम्मेदवारका आकांक्षीले संविधान, कानुन र पार्टीले बनाएको मापदण्ड पूरा गरेको हुनुपर्छ । यी सबै प्रक्रिया पूरा गरेका व्यक्तिले ५० हजार रुपैयाँ आवेदन शुल्क तिर्नुपर्छ,’ उनले भने, ‘यदि शुल्क तिर्न नसकिने स्पष्ट कारण खुलाएर निवेदन दिएमा त्यस्ता व्यक्तिको हकमा निःशुल्क व्यवस्था पार्टीले मिलाउँछ ।’
यसअघि कात्तिक १७ गतेका लागि रुपन्देही–३ मा घोषणा (प्रतिनिधिसभा विघटनपछि रद्द) गरिएको प्रतिनिधिसभा उपनिर्वाचनको हकमा रास्वपाले २५ हजार सेवा शुल्क तोकेको थियो ।
