झापा, मंसिर ६ । झापा गाउँपालिकाका बाढीपीडित विद्यार्थीहरुलाई फिल्टर वितरण गरिएको छ ।
झापाका सामाजिक अभियन्ता शरद जोशीले वाइन टु वाटर , राउण्ड टेबल नेपाल र रोटरी क्लब अफ काठमाण्डु हाइटको सहकार्यमा झापा गाउँपालिकाका २५० बाढीप्रभावित विद्यार्थीलाई नानो–मेम्ब्रेन प्रविधियुक्त पानी फिल्टर वितरण गरेका हुन् ।
गाउँपालिकाका चार विद्यालयका विद्यार्थीहरुलाई सो सहयोग प्रदान गरिएको थियो । हालैको बाढीबाट प्रभावित विद्यार्थी तथा परिवारलाई लक्षित गरी जनविकास माध्यमिक विद्यालय, अमृत माध्यमिक विद्यालय, इन्द्रेणी प्राथमिक विद्यालय तथा मदरसा–ए–इस्लाम रसुङ्गञ्जमा यो कार्यक्रम गरिएको हो।
कार्यक्रममा शरद जोशीले वाइन टु वाटरबाट प्राप्त फिल्टरको प्रयोग विधि तथा सरसफाइका तरिका विद्यार्थी र अभिभावकहरुलाई सिकाएका थिए। उनका अनुसार उचित विधि प्रयोग गर्न सकेमा अमेरिकामा निर्मित यो फिल्टर १० वर्षसम्म टिकाउ हुने क्षमता राख्छ।
कार्यक्रममा राउण्ड टेबल नेपालका अध्यक्ष सुमित मित्तल, एरिया को–अर्डिनेटर पियूष लुनिया, बिर्तामोड राउन्ड टेबल–२७ का अध्यक्ष विकास अग्रवाल, साथै सामाजिक व्यक्तित्व शम्भु सुस्केरा, प्रकाश पाठक, सोम बजगाईँ लगायतको उपस्थिति रहेको थियो।कार्यक्रममा राष्ट्रिय अध्यक्ष सुमित मित्तलले भने,“बिकट भूगोलमा आएर पीडित समुदायलाई सहयोग गर्न पाएकोमा हामी खुशी छौँ। आगामी दिनहरूमा पनि विकास र सेवामा निरन्तर समर्पित रहिरहनेछौँ।”
त्यसैगरी सहभागी विद्यालयका प्रधानाध्यापक, जनप्रतिनिधि तथा स्थानीय सरोकारवालाले बाढीपीडित विद्यार्थी तथा उनीहरुका परिवारलाई स्वच्छ पानी उपलब्ध गराउन यस सहयोगले ठूलो मद्दत पुग्ने बताएका छन्।
सामाजिक अभियन्ता जोशीका अनुसार हालसम्म इलामका ३५ परिवारलाई अस्थायी टहरा तथा झापा, सुनसरी र इलामका ६सयभन्दा बढी परिवारलाई सुरक्षित पानी फिल्टर वितरण गरिसकिएको छ। विशेषगरी दुर्गम तथा जोखिमयुक्त क्षेत्रमा सेवा पुर्याउँदै आएका उनी पछिल्ला १० वर्षदेखि निरन्तर सामाजिक कार्यमा सक्रिय रहेका छन्।
