झापा,मंसिर १२ । नेपाल विद्युत् प्राधिकरणले १० मेगावाटसम्म क्षमताका जलविद्युत् आयोजनाको विद्युत् खरिद–विक्री सम्झौता (पीपीए) खोल्ने निर्णय गरेको छ ।
प्राधिकरण सञ्चालक समिति बैठकले केही दिन अघि गत चैत १२ गतेसम्म ‘ग्रीड कनेक्सन एग्रिमेन्ट’ भइसकेका १० मेगावाटसम्म क्षमताका जलविद्युत् आयोजनाको विद्युत् खरिद सम्झौता गर्ने निर्णय गरेको हो ।
ऊर्जा मन्त्रालय स्रोतका अनुसार प्राधिकरण सञ्चालक समितिले १० मेगावाटसम्मका जलविद्युत् आयोजनाको विद्युत् खरिद–विक्री सम्झौता (पीपीए) ‘लिऊ वा तिर’ (टेक अर पे) प्रावधान अनुसार गर्ने गरी निर्णय गरेको छ ।
मन्त्रालय स्रोतका अनुसार चालु आर्थिक वर्षको बजेटमा सरकारले ‘टेक एण्ड पे’ नीतिको व्यवस्था गरे पनि तत्कालका लागि ‘टेक अर पे’ नीति अनुसार गर्ने निर्णय भएको छ ।
प्राधिकरणले नदी प्रवाहमा आधारित ‘आरओआर’ १० मेगावाटसम्मका र अर्धजलाशय ‘पीआरओआर’ जलविद्युत् आयोजनाहरूलाई ‘टेक अर पे’ प्रावधानमा पीपीए सम्झौता गर्ने निर्णय गरेको छ ।
‘बजेटको व्यवस्था अनुसार टेक एण्ड पे नीति अनुसार पीपीए गर्ने निर्णय गर्नु पर्ने भए पनि तत्कालका लागि प्राधिकरण सञ्चालक समितिले टेक अर पेमै पीपीए गर्ने निर्णय गरेको हो,’ स्रोतले भन्यो, ‘मन्त्रिपरिषदमा स्वीकृतिका लागि पठाइएको छ । स्वीकृत भएर आएपछि पीपीए सुरु हुन्छ ।’
त्यस्तै, प्राधिकरणले साना लगानीकर्तालाई जलविद्युत् आयोजना निर्माणमा प्रोत्साहन गर्न भन्दै विद्युत् खरिद सम्झौता (पीपीए) को कोटासमेत हटाउने भएको छ ।
प्राधिकरणका अनुसार १० मेगावाटसम्मका जलविद्युत् आयोजनाका लागि कोटा सिस्टम खारेज भएको छ ।
ऊर्जामन्त्री कुलमान घिसिङ र प्राधिकरणका प्रमुख कार्यकारी निर्देशक मनोज सिलवालको प्रमुख प्राथमिकता नै स्थानीय प्राकृतिक स्रोतको अधिकतम उपयोग र स्वदेशी साना लगानीकर्तालाई प्रोत्साहन गर्नुपर्ने छ ।
प्राधिकरणले नदी प्रवाहमा आधारित जलविद्युत् आयोजनाहरूको विद्युत् खरिद सम्झौता खुलाउने विषयमा अझै निर्णय गर्न सकेको छैन । प्राधिकरण सञ्चालक समितिका सदस्य श्याम किशोर यादवले १० मेगावाटभन्दा माथिका आयोजनाको पीपीएका विषयमा हालसम्म कुनै ठोस निर्णय हुन नसकेको बताए ।
मन्त्री र निर्देशकको प्राथमिकताका आधारमा जलविद्युतमा साना लगानीकर्ताको लगानी सुरक्षित गर्ने गरी कोटा प्रणाली खारेज गर्ने नीति लिएको मन्त्रालय स्रोतले जानकारी दिएको छ ।
प्राधिकरण सञ्चालक समितिको निर्णय अनुसार अब प्राधिकरणले प्रक्रिया पु¥याएर निवेदन दिने १० मेगावाटसम्मका जलविद्युत् आयोजनाको पीपीए हुने छ ।
