झापा,मंसिर १३ । नेपाल क्रिकेट संघ (क्यान) र मेरिलेबन क्रिकेट क्लब (एमसिसी)बीच नेपाल प्रिमियर लिग (एनपीएल)मा स्पिरिट अफ क्रिकेट अवार्ड सुरु गर्ने सहमति भएको छ।
शनिबार त्रिवि क्रिकेट रंगशालामा क्यानका सचिव पारस खड्का र एमसिसीका क्रिकेट तथा अप्रेशन निर्देशक रोब लिन्चले संयुक्त रूपमा उक्त अवार्डको घोषणा गरेका हुन्।
उक्त अवार्ड एनपीएलमा क्रिकेटको सम्मान गर्दै खेल प्रदर्शन गर्ने एक टोलीलाई प्रदान गरिने सचिव खड्काले जानकारी दिए।
मेरिलेबन क्रिकेट क्लब (एमसिसी)बाट प्राप्त उक्त अवार्डले एनपीएल टिमलाई थप प्रोत्साहन मिल्ने उनले बताए। उनले एनपीएलको आगामी संस्करणमा समेत स्पिरिट अफ क्रिकेट अवार्डले निरन्तरता पाउने विश्वास व्यक्त गरे।
त्यस्तै एमसिसीका क्रिकेट तथा अप्रेशन निर्देशक रोब लिन्चले नेपाली क्रिकेट निकै माथि पुगिसकेको भन्दै आगामी दिनमा थप सहयोग गर्न तयार रहेको बताए।
क्रिकेटलाई मर्यादित रूपमा अघि बढाउन एमसिसीले स्पिरिट अफ क्रिकेट अभियान चलाउँदै आएको छ।
