झापा, मंसिर १४ । विवादका कारण स्थगित नेकपा एमालेको झापा क्षेत्र नं २ को मतगणना रद्ध गरी शुरुबाटै पुनः गणना गरिने भएको छ ।
आज बिहानको राति २.३५ बजे विवादका कारण मतगणना स्थगित भएको थियो । आज बिहान ८ बजेदेखि पुनः मतगणना हुने आन्तरिक सहमति भएपनि मतगणना भोलि बिहान ८ बजेबाट पुनः सुरुबाटै मतगणना हुने सहमति भएको हो । आज दिउँसो महाधिवेशन प्रतिनिधि चयनका लागि स्थगित भएको मतगणना पुनः सुरु गर्ने विषयमा सहमति भएको थियो ।
महाधिवेशन प्रतिनिधिको खुल्लातर्फको प्रतिष्पर्धामा कोशी प्रदेश सरकारका खानेपानी , सिंचाई तथा ऊर्जामन्त्री एकराज कार्की , प्रदेश सांसद चिन्तन पाठक, नेकपा एमाले झापाका अध्यक्ष प्रेमबहादुर गिरी , बिर्तामोड नगर अध्यक्ष सुवास भट्टराई , अर्जुनधारा नगरपालिकाका नगर प्रमुख बलदेवसिंह गोम्देन र पेशागत महासंघका स्थायी कमिटी सदस्य एवम् १ नं प्रदेश अध्यक्ष देवराज कार्कीबीच कडा टक्कर देखिएको छ । खुल्लामा १९ जना प्रतिष्पर्धी रहेका थिए । तर ६ जनाबीच कडा प्रतिष्पर्धा देखिएको छ । पाँचजना महाधिवेशन प्रतिनिधि छानिनु पर्नेमा ६ जनामध्ये एकजना महाधिवेशन प्रतिनिधि बन्न नपाउने भएका छन् ।
बिहानको राति बिर्तामोड ४ स्थित एमालेको जिल्ला पार्टी कार्यालयमा अर्जुनधारा नगरपालिकाका नगर प्रमुख बलदेबसिंह गोम्देनको नामबाट आएको सदर मतलाई बदर बनाई गन्ती नगरेको भन्दै १२÷१५ जनाको स्थानीय युवाहरुले विवाद गरेका थिए । त्यसपछि मतगणना रोकिएको हो ।
बिर्तामोड नगरपालिका वडा नम्बर १ देखि ९ नम्बर वडा, अर्जुनधारा नगरपालिका वडा नम्बर १ देखि ११ सम्म र कन्काई नगरपालिका वडा नम्बर ८ र ९ को मतगणना भइरहेको अबस्थामा विवाद भएको बताइएको छ । नगर प्रमुख ६ जनामध्ये सबैभन्दा पुछारमा रहेका छन् । मतगणना रोकिँदासम्म एकराज कार्कीले १२८१ , सुवास भट्टराईले ११४१ ,प्रेमबहादुर गिरीले १११३ , चिन्तन पाठकले १०६३ ,देवराज कार्कीले १०६३ र बलदेवसिंह गोम्देनले १०१७ मत ल्याएका छन् । अब मात्र ५९४ मत गणना हुन बाँकी रहेको छ । सदर मतलाई बदर मत गन्ती गरेको र केही मतपत्र च्यातेको भन्दै नगर प्रमुख गोम्देन पक्षधरहरुले शुरुदेखि नै पुनः मतगणना गर्नुपर्ने अडान राखेका थिए ।
