झापा, पुष ८ । जाँचबुझ आयोगले तत्कालीन प्रधानमन्त्री तथा पार्टी अध्यक्ष केपी ओलीलाई बयानका लागि बोलाउन लागेपछि त्यसको विरुद्धमा एमालेले झापामा खबरदारी कार्यक्रम गर्ने भएको छ ।
एमाले झापाले पर्सी पुष १० गते बिर्तामोड र दमकमा एकैदिन खबरदारी कार्यक्रम गर्ने भएको हो । भदौ २३ र २४ गतेको घटनासम्बन्धी जाँचबुझ आयोगले तत्कालीन प्रधानमन्त्री केपी ओलीलाई बयानका लागि बोलाउन लागेपछि त्यसको विरुद्धमा एमालेले खबरदारी कार्यक्रम गर्न लागिएको जिल्ला अध्यक्ष प्रेम गिरीले बताए ।
आज जिल्ला पार्टी कार्यालय बिर्तामोडमा पत्रकार सम्मेलन गर्दै अध्यक्ष गिरीले आफ्नो पार्टीका अध्यक्ष एवम् पूर्वप्रधानमन्त्रीलगायत अन्य नेताहरुउपर अनेक किसिमका बहानाबाजी, षड्यन्त्र र आक्रमणहरुलाई सहेर बस्न नसक्ने बताउँदै सबै किसिमका षडयन्त्रविरुद्ध भण्डाफोर गर्दै खबरदारी गर्न लागिएको जानकारी दिए । उनले यस किसिमका खबरदारी लगातार गरिरहने बताए ।
जिल्लाका सबै पालिका, वडा र टोलमा सुरक्षा समिति परिचालन गरिने बताउँदै अध्यक्ष गिरीले आफूहरु कसैमाथि आक्रमण नगर्ने तर वर्तमान प्रतिगामी सत्ता र विदेशी दलालहरुबाट हुनसक्ने हुलहुज्जतलाई जवाफी हमलाका लागि गाउँ–गाउँ र बस्ती बस्तीमा प्रतिरक्षा गर्न तम्तयार अवस्थामा रहन कार्यकर्ताहरुलाई अपिल गरेका छन् ।
एमाले झापाको प्रेस विज्ञप्तिको पूर्णपाठ
आदरणीय सञ्चारकर्मी सार्थीहरु, दाजुभाइ तथा दिदीबहिनीहरु ,
गत भाद्र २३ र २४ गते जेनजीको नाममा भएको प्रदर्शनको क्रममा घुसपैठ भई होनहार विद्यार्थी, सुरक्षाकर्मी र नागरिकहरु निधन हुनका साथै घाइते भएका छन् । सर्वप्रथम नेकपा (एमाले) झापा जिल्ला कमिटी दिवंगतहरुप्रति श्रद्धाञ्जली एवम् घाइतेहरुप्रति शीघ्र स्वास्थ्यलाभको कामना गर्दछ। यसै क्रममा सिंहदरबार, राष्ट्रपति भवन, प्रधानमन्त्री निवास, सर्वोच्च अदालत, संसद भवन, अख्तियारको कार्यालय, अन्य सरकारी कार्यालयहरु, सरकारी सवारी साधन, सयौंको संख्यामा व्यक्तिहरुको घर तथा सवारी साधन, पार्टी कार्यालयहरु, व्यवसायिक प्रतिष्ठानहरु, सहकारी, बैंक लगायतमा आगजनी गरी ध्वस्त पारिएको छ। भदौ २३ गते जेनजीको शान्तिपूर्ण प्रदर्शनपश्चात् तत्कालीन प्रधानमन्त्री केपी शर्मा ओली र गृहमन्त्री रमेश लेखकले राजीनामा दिइसकेपछि २४ गते व्यापक तोडफोड आगजनी र नागरिकको हत्या गरिएको हो ।
आदरणीय सञ्चारकर्मी मित्रहरु,
भदौ २४ गतेको देशव्यापी विध्वंस आकस्मिक नभई देशी विदेशी शक्तिको लामो योजना र षड्यन्त्रको परिणाम थियो । नेपालमा अनेक खालका अस्थिरता जन्माएर त्यसमा खेल्ने र आफ्नो स्वार्थ पूरा गर्ने विदेशी शक्तिको भूमिका प्रमुख छ । त्यसका लागि नियोजित ढंगले दलाल जन्माउने र त्यसलाई बल पुर्याउने खेलको परिणाम नै वर्तमान सरकारका प्रधानमन्त्री र मन्त्रीहरुका कर्तुतहरु धमाधम बाहिरिरहेका छन्। राष्ट्र, राष्ट्रियता र स्वाधीनता बोकेका मुख्य दलहरुलाई निषेध गरी सोझै विदेशी शक्तिको वकालत गर्ने व्यक्ति तथा दलहरुलाई वर्तमान सरकारले प्रोत्साहन गर्दै आएको छ ।
वर्तमान सुशीला कार्की सरकार फाल्गुण २१ गते चुनाव गराउने म्यान्डेटमा गठन भएको छ । तर यो सरकार शान्ति सुरक्षाप्रति गम्भीर छैन । जेलबाट भगाइएका अपराधी अहिले पनि नियन्त्रणमा लिने काम भइरहेको छैन । सुरक्षा कार्यालयबाट लुटिएका हतियार फिर्ता आइसकेका छैनन् । सुरक्षाकर्मीलाई भाद्र २४ गते व्याक गराई उनीहरुमाथि भएको हमलाबाट अहिले पनि सुरक्षाकर्मीको पूर्ण मनोबल उठाउने काम हुन सकेको छैन । हाम्रो पार्टी अध्यक्षलाई स्थान हद गर्ने र सुरक्षा जनशक्ति घटाउने काम भएको छ । पूर्व प्रहरी प्रमुख लगायतलाई समेत स्थान हद गरिएको छ। यस कार्यप्रति हाम्रो पार्टी घोर आपत्ति व्यक्त गर्दछ ।
लोकतन्त्रको लागि रगतपसिना बगाएका मुख्य दलहरुलाई भए नभएका झुटा आक्षेप लगाएर बदनाम गर्ने काम भएको छ । ठुला दलहरुलाई अवरोध सृजना गरेर चुनावमा जाने वातावरण नदिएर कुन किसिमको चुनाव गर्न खोजिएको हो ? हाम्रो प्रश्न छ । नेकपा (एमाले) जनताको मतमा विश्वास गर्ने पार्टी हो। यसअघि भएको निर्वाचनले पनि त्यसलाई पुष्टि गरेको छ ।
शान्तिपूर्ण निष्पक्ष चुनावको वातावरण बनाउनुभन्दा पनि वर्तमान सरकार अनेक खालका षड्यन्त्रको तानाबाना बुनेर बसेको छ । विदेशी शक्तिहरु र त्यसका दलालहरु धार्मिक, जातीय हिंसा भड्काएर नेपाली नेपालीहरुलाई जुधाएर जबरजस्ती आफ्नो प्रत्यक्ष उपस्थिति कायम गर्ने षड्यन्त्रमा रहेको हाम्रो ठहर छ ।
यस्ता क्रियाकलाप र गतिविधिमाथि नेकपा (एमाले) झापा टुलुटुलु हेरेर बसिरहन सक्दैन। देश, संविधान र लोकतन्त्रको रक्षा गर्न, धार्मिक तथा जातीय सद्भाव कायम गर्नका लागि जस्तोसुकै मूल्य चुकाउन हामी तयार छौ । देशमा संवैधानिक संकट खडा गरेर स्वार्थ सिद्ध गर्ने जुनसुकै व्यक्ति, संस्था र शक्ति केन्द्रलाई परास्त गर्नु आजको आवश्यकता हो। निर्वाचन हुन नसक्ने अवस्थामा संसदको पुनर्स्थापना, संविधान संशोधन, सर्वपक्षीय सरकार गठन गरी अर्ली इलेक्सनको माध्यमबाट देशलाई संवैधानिक लिगमा ल्याउनु आजको आवश्यकता हो
भाद्र २३ र २४ गतेको घटनामा निवर्तमान प्रधानमन्त्री केपी शर्मा ओली र गृहमन्त्री रमेश लेखकलाई जबरजस्ती अपराधी करार गर्ने प्रयास गरिदैछ । तत्कालीन जिम्मेवार व्यक्तिले नैतिकताको आधारमा कमजोरी स्वीकार्नु स्वभाविक बिषय हो तर आन्दोलनमा घुसपैठ गरी गोली चलाइएको कसले जिम्मा लिने ? निष्पक्ष छानविन र जाँचबुझ गर्नु पर्छ कि पर्दैन ? अति मूल्यवान र गोप्य कागजपत्र जलाइएको छानबिन र अनुसन्धान हुनु पर्छ कि पर्दैन ? सुरक्षाकर्मीको भूमिकामा एकरुपता देखिएको छैन र अनेक प्रश्न उठेका छन् त्यसको जाँचबुझ र छानबिन हुन् पर्छ कि पर्दैन? गठित आयोगको जिम्मेवार व्यक्तिले छानबिन अगावै आफ्नै सामाजिक सञ्जालमार्फत हिंसा भड्काउने र दलका नेताहरुमाथि आक्रमण गराउने किसिमका लेख र अभिव्यक्तिहरु सार्वजनिक भएका छन् । त्यस्तो व्यक्तिले गर्ने छानबिन र सोको निष्पक्षतामाथि उठेको प्रश्नको निरुपण हुनु पर्छ कि पर्दैन ?
अध्याँरो कोठामा बसेर गरेको षड्यन्त्रको नेकपा (एमाले) भण्डाफोर गरी जनतालाई सचेत गराउन चाहन्छ । देशमा देखापरेको तमाम समस्या समाधान गर्ने ल्याकत मुख्य दलहरुसँग छ, जसले अनेकौं समस्या र बाधा पन्छाउँदै यहाँसम्म आइपुगेका छन् । सहज अवस्थामा फुत्त बाहिर निस्केकाहरुले मात्र यी तमाम समस्या हल गर्न नसक्ने हाम्रो ठहर छ ।
अतः यस्तो संवेदनशील अवस्थामा नेकपा (एमाले) जस्तो राष्ट्रवादी र जनताप्रति जिम्मेवार पार्टी टुलुटुलु हेरेर बस्न सक्दैन । प्रतिगामी तत्वहरुको षड्यन्त्रउपर मुकदर्शक बस्न सक्दैन। हाम्रो पार्टीका श्रद्धेय अध्यक्ष एवम् पूर्वप्रधानमन्त्री तथा अन्य नेताहरुउपर अनेक किसिमका बहानाबाजी, षड्यन्त्र र आक्रमणहरुलाई सहेर बस्न सक्दैन । सबै किसिमका षडयन्त्रको विरुद्ध भण्डाफोर गर्दै खबरदारी गर्न सबै लोकतान्त्रिक दल र शक्तिहरुलाई आह्वान गर्दछौ । विविध प्रदर्शनका कार्यक्रमहरु क्रमागत रुपमा आयोजना हुनेछन् । सबै पालिका, वडा र टोलसम्म सुरक्षा समिति परिचालन गर्नु पर्नेछ। हामी कसैमाथि आक्रमण गर्दैनौं तर वर्तमान प्रतिगामी सत्ता र विदेशी दलालहरुबाट हुनसक्ने हुलहुज्जतलाई जवाफी हमलाका लागि गाउँ–गाउँ र बस्ती बस्तीमा प्रतिरक्षा गर्न तम्तयार अवस्थामा रहन सम्पूर्णमा हार्दिक अपिल गर्दछौ। यही मिति २०८२ पौष १० गते दमक र बिर्तामोडमा “खबरदारी कार्यक्रम” आयोजना गरिएको हुँदा सहभागिताको लागि हार्दिक आह्वान गर्दछौं ।
प्रेम गिरी
अध्यक्ष
