झापा, पुष ९ । इलाका प्रहरी कार्यालय दमकले स्वीप अपरेसनसंगै विगत १० दिनदेखि सरप्राइज चेकिङ संचालन गरिरहेको छ । ट्राफिक प्रहरीसंगको त्यस संयुक्त चेकिङबाट धेरै मोडिफाइड मोटरसाइकल कार्वाहीमा परिसकेका छन् ।
मोडिफाइड मोटरसाइकलसंगै ट्राफिक नियम उल्लंघन गर्ने दर्जनौ सवारी साधन कार्वाहीमा परेको इलाका प्रहरी कार्यालय दमकका डीएसपी किशोर लम्सालले बताए । मोडिफाई मोटरसाइकलहरु ध्वनि प्रदूषण गर्दै राति कुदाउने गरेका कारण दमक प्रहरीले रातको समयमा नै सरप्राइज चेकिङ गर्ने गरेको छ ।
गएराति १०.३० बजे दमक ५गोर्खा डिपार्टमेन्ट अगाडी ट्राफिक नियम उल्लंघन गर्ने बा८२ प ५७४नम्बरको मोडिफाइड गरेको बुलेट मोटरसाइकल प्रहरीले नियन्त्रणमा लिएको छ ।
त्यसको अघिल्लो राति ९ वटा मोटरसाइकल कार्वाहीमा परेका थिए । प्र १–०१–०१५ प ६७२८ नम्बरको इभी स्कुटर कागजपत्र नभएको,को ४० प २२९४ नम्बरको बुलेट मोटरसाइकल मोडिफाइड,मे ५ प ७३२७ नम्बरको सुपर स्प्लेण्डर ३ जना सवार ,प्र१–०२–०५६ प ३९७१ नम्बरको बुलेट मोटरसाइकल मोडिफाइड, प्र२–०२–०२३ प ०७०८ नम्बरको बुलेट मोटरसाइकल लुकिङ ग्लास नभएको , मे ७ प २४१९ नम्बरको एभेन्जर मोटरसाइकल मोडिफाइड , मे १० प ९३२३ , मे ८ प २६६७ नम्बरको स्कुटी कागजपत्र नभएको र को ३८ प ८२५५ नम्बरको क्रसफायर मोटरसाइकल मोडिफाइड गरिएको फेला परेको प्रहरीले जनाएको छ ।
सोही राति गरिएको स्वीप अपरेसनमा दमक नगरपालिकाको विभिन्न स्थानबाट शंकास्पद अवस्थामा हिडडुल गर्ने, अनैतिक क्रियाकलापमा संलग्न हुन सक्ने, लागूऔषधमा संलग्न हुन सक्ने आशंकामा ६ जनालाई नियन्त्रणमा लिइएको थियो ।
करिव डेढ महिनादेखि डीएसपी लम्सालले इलाका प्रहरी कार्यालय दमकको कमाण्ड सम्हालेका छन् । आएको एक सातादेखि स्वीप अपरेसन थालेका उनले शंकास्पद गतिविधि गर्ने डेढ सयभन्दा बढीलाई नियन्त्रणमा लिइसकेका छन् । त्यस्तै सयभन्दा बढी मोडिफाइड मोटरसाइकललाई कार्वाही गरिसकेको उनले जानकारी दिए ।
दमक क्षेत्रका मोटरसाइकललाई कार्वाही गरिसकेको भएपनि बाहिरबाट आउने गरेका मोडिफाइड मोटरसाइकललाई समेत नियन्त्रणमा लिई कार्वाही गर्न थालिएको डीएसपी लम्सालको भनाई छ ।
