दमक, जेठ २२ । झापाको दमक नगरपालिका ३ मा निर्माण गरिने विश्वकै अग्लो बुद्धमूर्ति निर्माणस्थलमा घेराबाराको काम शुरु भएको छ ।
संघीय सरकारले चालु आर्थिक बर्षमा सो घेराबाराका लागि एक करोड रुपैयाँ विनियोजन गरेपछि ठेक्का प्रकृयाबाट हेना कन्स्ट्रक्सनले ६८ लाख रुपैयाँमा काम सम्पन्न गर्ने गरी कामको सम्झौता गरेको नगरपालिकाले जनाएको छ ।
घेराबाराको बुधबार यहाँ आयोजित एक कार्यक्रमकाबीच नगरपालिकाका प्रमुख रोमनाथ ओली, उपप्रमुख गीता अधिकारी र प्रमुख प्रशासकीय अधिकृत गणेश तिम्सिनाले संयुक्तरुपमा शिलान्यास गरेका हुन् । त्यहाँ ३५० मिटर लामो कंक्रिट र गृलको घेराबारा गरिने दमक ३ का वडाध्यक्ष नविन बरालले जानकारी दिए । नगर प्रमुख ओलीले शिलान्यास कार्यक्रममा संक्षिप्त मन्तव्य राख्दै निर्धारित समयभित्रै घेराबाराको काम सम्पन्न हुनेमा विश्वास व्यक्त गरे । उनले त्यहाँ निर्माण हुने राष्ट्रियस्तरको सो योजनाले दमकलाई संसारभरि चिनाउने बताए । करिव १६० बिगाहा जमिनको व्यवस्था गरी विश्वकै अग्लो बुद्धमूर्ति बनाउन लागिएको नगरपालिकाले जनाएको छ ।
बुद्धमूर्ति पार्क बनाउन १७ अर्ब ९५ करोड खर्च लाग्ने अनुमान गरिएको छ । दमक नगरपालिकाले विराट बुद्धप्रतिमा आयोजनाको विस्तृत आयोजना प्रतिवेदन तयार गरिसकेको छ । बुद्धको मूर्ति ५४२ फिट अग्लो हुने तथा आयोजना छ वर्षभित्र सम्पन्न हुने बताइएको छ ।
आयोजनाभित्र करिब २० बिगाहाको पार्क हुनेछ भने बुद्ध मूर्तिको आकृति हेर्न एक बिगाहाको पोखरी निर्माण गरिनेछ । त्यहाँ स्तुपा, गुम्बा, बौद्ध विश्वविद्यालय, ध्यान केन्द्र, सपिङ मल, अस्पताल, धर्मशालालगायतका संरचना निर्माण हुनेछ ।
