झापा, साउन ३२ । समुदायमै कोरोना संक्रमण फैलिएको विराटनगर महानगरपालिकामा शंकास्पद व्यक्तिहरुको पिसिआर परीक्षण गर्न स्वाब संकलन गर्ने काम नै अबरुद्ध भएको छ । कोरोना परीक्षणको लागि स्वाब संकलनमा खटिने एक चिकित्सकमा आइतबार कोराना संक्रमण पुष्टि भएपछि स्वाब संकलन कार्य नै रोकिएको हो ।
स्वाब संकलनमा खटिने चिकित्सकमा नै कोरोना देखिएपछि तत्कालका लागि स्वाब संकलन कार्य अघि बढ्न नसकेको महानगरका जनस्वास्थ्य महाशाखा प्रमुख रमेश कार्कीले बताए । चिकित्सकमा ज्वरो आउनेलगायत कोरोनासँग मिल्दोजुल्दो लक्षण देखिएपछि स्वाब संकलन गरेर परीक्षण गर्दा कोरोना पोजिटिभ देखिएको हो ।
चिकित्सकमा कोरोना देखिएपछि स्वास्थ्य महाशाखाका कर्मचारी क्वारेन्टाइनमा बसेका छन् । उनीहरुको कोरोना परीक्षण गराएर रिपोर्ट आएपछि मात्र स्वाब संकलनको काम सुरु गरिने महानगरपालिकाले जनाएको छ । काममासँगै खटिएका चिकित्सकमा कोरोना पुष्टि भएपछि जोखिम रहेकोले स्वाब संकलन रोकिएको कार्कीले बताए । चिकित्सकको सम्पर्कमा रहेका सबैको पीसीआर परीक्षण गराएपछि मात्र अन्यको स्वाब संकलन थाल्ने महानगरको तयारी छ ।
