दमक, असोज २९ । दमक –८ स्थित राष्ट्रिय बहुमुखी सहकारी संस्थाले बुधबार आयोजना गरेको रक्तदानमा ५२ पिन्ट रगत संकलन भएको छ ।
सहकारीको २१ औं बार्षिक साधारणसभा तथा स्थापना दिवसको अवसर पारेर नेपाल रेडक्रस सोसाइटी उपशाखा दमकस्थित रक्तसञ्चार केन्द्रमा सम्पन्न रक्तदानमा १४ महिलासहित ५२ जनाले रगतदान गरेका थिए ।
रक्तदानमा सञ्चालक समिति, विभिन्न उपसमितिहरु, शेयर सदस्यहरुले रक्तदान गरेको कार्यक्रम संयोजक समेत रहेका संस्थाका उपाध्यक्ष धनराज राईले बताएका छन् ।
सोही अवसरमा सहकारीले सामाजिक कार्यक्रमअन्तर्गत रेडक्रस दमक उपशाखा दमक र रेडक्रस लखनपुर उपशाखाद्वारा सञ्चालित एम्बुलेन्सका चालकलाई १ – १ सेट पिपिई हस्तान्तरण गरेको थियो ।
संस्थाले २१ औं बार्षिक साधारणसभाको कार्यक्रम भने असोज २९ देखि शुरु गर्ने जनाइएको छ । सञ्चालक समितिका अध्यक्ष जितमान राईले यस बर्ष कोरोना महामारीका कारण साधारणसभा अन्तर्गत सदस्यहरुलाई प्रतिवेदन वितरण र राय सुझावहरु संकलन गरिने बताए । स्वास्थ्य सुरक्षा मापदण्ड अपनाउँदै सदस्यहरुलाई २९ असोजदेखि ४ गतेसम्म साधारणसभामा सहभागिताका लागि आव्हान गरिएको उनले बताए ।
