बिर्तामोड , कात्तिक ९ । पूर्वकै प्रसिद्ध धार्मिकस्थल गरामनीको दुर्गा मन्दिरमा भक्तालुहरुले सामाजिक दुरी राखेर विहानैदेखि पुजाआजा गरिरहेका छन् ।
कोरोेना संक्रमणका कारण सामुहिक पुजाआजामा रोक लगाएको बताइपनि दर्शनका लागि आउने भक्तालुहरुका लागि सामाजिक दुरी राखेर दर्शन गर्न दिने व्यवस्था मिलाइएको गरामनी शक्तिपीठ मठमन्दिर समितिले जनाएको छ । कोरोना संक्रमणका कारण बिर्तामोड नगरपालिकाले नगरभरिका धार्मिकस्थलहरुमा पुजापाठ नगर्न र नगराउन निर्देशन दिएको थियो । गरामनीको ऐतिहासिक एवं पुरातात्विक महत्वको दुर्गा भगवतीको शक्तिपीठमा दशैंको महानवमीका दिन बिशेष पुजाआजा हुने गर्दछ । जसलाई पूर्वकै ठूलो मान्ने गरिन्छ ।
आज विहान २.३० बजेदेखि मन्दिरमा पुजा शुरु गरिएको हो । गरामनी शक्तिपीठ मठमन्दिर समितिका अध्यक्ष एकराज कार्कीले कोरोना संक्रमणका बावजुद धार्मिक आस्थालाई कायम राख्दै मन्दिर खुल्ला राखिएको जानकारी दिए ।
कोरोना महामारीको संक्रमणको खतरासँगै धार्मिक आस्थाको कुरा भएकाले दर्शनका लागि भक्तालुहरुलाई पूर्णरुपमा निषेध गर्न नसकिएको उनले बताए । भक्तालुहरुलाई व्यवस्थित गर्न प्रहरीलाई जिम्मा दिइएको छ । यस वर्ष स्वयंसेवक परिचालन गरिएको छैन ।सामाजिक दुरी भनिएपनि भक्तालुहरुको भीड देखिएको थियो ।
त्यस्तै बिर्ताबजारको नवनिर्मित दुर्गा मन्दिरमा पनि भक्तालुहरुलाई पुजाआराधना गर्न खुल्ला गरिएको छ । बिहानैदेखि त्यहाँ भक्तालुहरुले पुजा अर्चना गरिरहेका छन् । पुरानो ऐतिहासिक दुर्गा मन्दिरबाट मूर्ति नयाँ मन्दिरमा स्थानान्तरण गरिएको थियो ।
गरामनीको दुर्गा मन्दिरमा यस वर्ष बली पूजालाई निरुत्साहित गरिएको छ । भक्तालुहरुले वलीका लागि ल्याएका पशुलाई भाकल गर्न दिई काट्न घर लिएर गएका छन् । सो मन्दिर वली पूजाका लागि प्रख्यात रहेको छ । विगतमा त्यहाँ सयौको सँख्यामा बोका , परेवा , हाँस र राँगाको वली चढ्ने गर्दथ्यो । ठूलो धार्मिक महत्व बोकेको त्यस मन्दिरमा दर्शनका लागि देशभित्रका मात्र नभएर भारतका भक्तालुहरु समेत आउने गरेका छन् ।
तर, बिर्ताबजारको दुर्गा मन्दिरमा भने वली पुजालाई यथावत राखिएको छ । वली पुजालाई यस वर्ष पनि निरन्तरता दिइएको नव दुर्गा मन्दिर पुजा समितिका अध्यक्ष वासु माझीले बताए ।
