बिर्तामोड , बैशाख २३ । बिर्तामोड १० का पवन राजवंशी र लक्ष्मी संग्रौला भूमिपति हुन् । दुवैको कठ्ठामा मात्र होईन, करोडौं पर्ने विगाहमा जग्गा छ ।दुवैबीच यतिबेला विवाद चलेको छ ऐलानी जग्गा कमबेसी नम्बरी बनाएको विषयमा । २०६७ सालको सुकुम्बासी आयोगबाट ती दुवैले खाली ऐलानी जग्गा मात्र नम्बरी बनाएनन् , पुस्तौदेखि मुसहरहरुले बसोबास गरिरहेको वस्ती पनि आफ्नो नाममा पारेको खुलासा भएको छ ।
बिर्तामोडको सैनिकमोडदेखि सैनिक बजार जाने सडकको छेउमै विराटपोखरमा रहेको सिंगो मुसहरवस्तीको जग्गा पवन राजवंशीले आफ्नो नाममा पारेका हुन् । गरिब भूमिहीन मुसहरहरु त्यहाँ बसेको पुस्तौं भयो । त्यहाँ ७ घर मुसहर छन् । पटकपटक आएको सुकुम्बासी आयोगबाट आफूहरु बसेको जग्गाको लालपूर्जा मुसहरहरुले पाएनन् । तर, आयोगले करिव दुई विगाहका मालिक राजवंशीलाई त्यसको लालपूर्जा दियो । प्रेम दाहालको अध्यक्षतामा बनेको आयोगबाट राजवंशीले त्यसको पूर्जा ल्याएका हुन् ।
साविक नक्सा अनुसार कि.नं. १५१ मा रहेको सिंगो मुसहरवस्ती राजवंशीले हत्याएका हुन् । त्योसँगै मुसहरवस्ती दक्षिणपट्टि रहेको कि. नं. ७६ , ७७ र ७८को ऐलानी जग्गा पनि राजवंशी र संग्रौलाले आ–आफ्नो नाममा पारेका छन् । ७६ र ७७ को एक कठ्ठा ५ धुर जग्गा संग्रौलाले आफ्नो नाममा पारेका छन् भने राजवंशीले कि. नं. ७८ को जग्गा नम्बरी बनाएका छन् । संग्रौलाले भोगचलनभन्दा धेरै जग्गा लिएको भनी राजवंशीले आपत्ति जनाएका छन् । ऐलानी जग्गामा हानाथापको विषयमा दुवै भूमिपतिबीच विवाद चलिरहेको छ । मुसहरवस्तीलाई आफ्नो नाममा पारेका राजवंशीले सर्पट नापीमा हालसाविक पनि गरिसकेका छन् ।
गत वर्ष बिर्तामोडको १० नं वडा कार्यालयले भूमिहीन मुसहरहरुलाई उनीहरु बसेकै ठाउँमा घर बनाइदिनका लागि नापजाँच गर्दा सो जग्गा राजवंशीले आफ्नो नाममा पारेको पत्ता लागेको थियो । वडाध्यक्ष दुर्याेधन गुरुङले पटकपटक राजवंशीलाई मुसहरहरु बसेको जग्गा फिर्ता गर्न दवाव दिएपनि उनले फिर्ता गरेका छैनन् । ऐलानी जग्गा हत्याउने विषयमा राजवंशी र संग्रौलाबीच विवाद चर्किएपछि नगर प्रमुख ध्रुवकुमार शिवाकोटीले पनि मुसहरवस्तीको जग्गा फिर्ता गर्न भनेका थिए । राजवंशीले सो जग्गा फिर्ता नगरे वर्षौदेखि बसोबास गरेका मुसहरहरुको उठीबास हुने भएको छ । सुकुम्बासीलाई जग्गा दिन भनेर गठन भएका आयोगबाट वास्तविक सुकुम्वासीभन्दा ढुकुम्बासीहरुले नै जग्गा प्राप्त गर्ने गरेको उदाहरण धेरै छन् । राजवंशीले जग्गा नाममा पारेपनि आफूहरु कुनै पनि हालतमा वर्षौदेखि बसेको ठाउँ नछोड्ने सिताराम ऋषिदेवले बताए ।
