काम, क्रोध, लोभ, मोह छोड्न कहाँ आसान छ ।
जोगी –त्यागीकै लागि पनि यो युद्ध घमासान छ ।।
धर्म बेच्छ मान्छे यहाँ बाइबल, गीता, कुरानमा ।
जान्दछ यी सबै मान्छे तर पनि अञ्जान छ ।।
वासनाको राग हेर देव– दानव सबैमा उस्तै ।
शरीरभित्र त्यसको आफ्नै ठूलो आसमान छ ।
धनी असाध्य कोही छन् कोही हेर भिकमंगा ।
सृष्टिभित्रै सृष्टिकर्ताको वितरण असमान छ ।।
कति भाग्छ मान्छे यहाँ सपनालाई पछ्याउँदै ।
सजाएर चिता उसलाई कुरिरहेको श्मसान छ ।।
