बिर्तामोड ,असोज २३ । झापाको बिर्तामोडमा सञ्चालन भईरहेको वडास्तरीय फुटबल प्रतियोगितामा वडा नम्बर ४ फाइनलमा प्रवेश गरेको छ ।
बिर्तामोड नगर खेलकुद विकास समितिको आयोजनामा संचालन भइरहेको प्रतियोगिता अन्तर्गत शनिबार भएको सेमिफाइनल खेलमा वडा नम्बर १० लाई पराजित गर्दै वडा नम्बर ४ ले फाईनलमा स्थान सुरक्षित गरेको हो । निर्धारित समय २–२ गोलको बराबरी भएपछि खेल टाइब्रेकरमा पुगेको थियो । टाइब्रेकरमा ५–४ गोल अन्तरले वडा नम्बर ४ विजयी बनेको हो । निर्धारित समयमा वडा ४ का नरेन लिम्बू र रमेश गुरुङले १–१ तथा वडा नं १० का अभिषेक गुरुङले २ गोल गरेका थिए । खेलको म्यान अफ द म्याच वडा नम्बर ४ का योगेश गुरुङ घोषित भए । फाइनल खेल आगामी सोमबार वडा नम्बर ६ र ४ बीच हुने उपाध्यक्ष केशव भण्डारीले जानकारी दिए ।
