बिर्तामोड , असार २६ । फोहोर फ्याक्ने ठाउँको व्यवस्थापन गर्न नसके साउन महिनादेखि बिर्तामोडबासीले घरको फोहोर घरभित्रै राख्नुपर्ने अबस्था देखिएको छ ।

अहिले कनकाई नगरपालिकाको वडा नं ८ स्थित विरीङ खोलाको बगरमा फोहोर फ्याल्ने गरिएकोमा असार मसान्तपछि त्यसको संझौता सकिदैछ । बिर्तामोड नगरपालिकाले त्यस ठाउँमा फोहोर फ्याल्न एक वर्षका लागि २० लाख रुपैयाँ बुझाएको थियो ।

बिर्तामोडमा फोहोरमैलाको समस्या विकराल रहेको प्रमुख प्रशासकीय अधिकृत विनोदकुमार न्यौपानेले बताए । ‘असारभित्रको संझौता मात्र छ, साउनदेखि संझौता सकिदैछ’ रिपोर्टर्स क्लब नेपालले आयोजना गरेको साक्षात्कार कार्यक्रममा उनले भने, ‘ अब कहाँ फोहोर फ्याल्ने भनेर उपाय निस्किएन भने स्थिति भयावह हुनसक्छ ।’ बिर्तामोडबासीहरुले उत्पादन गरिरहेको फोहोर विसर्जन गर्ने दीगो ठाउँ अहिलेसम्म भेटिएको छैन । जनप्रतिनिधिहरुको पहिलो पाँच वर्षे कार्यकाल फोहोर फ्याल्ने ठाउँ खोज्दाखोज्दै बित्यो । पाँच वर्षमा नगरपालिका कार्यालयको कम्पाउन्ड , यान्त्रिक कार्यालयको अगाडि ,वडाध्यक्ष अग्नी पाण्डेको चिया बगान , वडा नं ८ को मधुकर गौतमको जमिन ,बिर्तामोड ३ को मुसहरबस्ती , डोमालाल राजवंशी रंगशालाको पश्चिमपट्टिको जमिनलगायत खाली जग्गा ,खोलाखोल्सी , बाटो सबै डम्पिङ साइट बन्यो । विगत एक वर्षदेखि कनकाई नगरपालिका ८ को विरीङ खोलाको बगरमा फोहोर फ्याल्ने काम भइरहेको छ । त्यहाँ फ्याल्न नदिने भएपछि फेरि समस्या देखिने भएको हो ।

फोहोर व्यवस्थापन अब कसरी गर्ने भन्ने विषयमा चरण–चरणमा बहस र छलफल भइरहेको प्रमुख प्रशासकीय अधिकृत न्यौपानले बताए । ‘यदि त्यसबाट निष्कर्ष निस्किएन भने स्थिति जटिल बन्न सक्छ’उनले भने । बिर्तामोड नगरपालिकाले फोहोरमैलाको दीगो व्यवस्थापनका लागि कन्काई ८ को कन्काई–बिर्ता– अर्जुन नवकिरणीय वैकल्पिक ऊर्जामा प्रवन्ध गर्न लागेको छ । जसमा नगरपालिकाले १ करोड ७५ लाख रुपैयाँ लगानी गरेको छ । जुन परियोजना तीन महिनापछि निर्माण हुँदैछ ।

बिर्तामोडमा फोहोरमैलाको समस्या ठूलो चुनौतीको रुपमा रहेको वडा नं १ का वडाध्यक्ष अग्नी पाण्डेले बताए । दोस्रो कार्यकालका लागि निर्वाचित पाण्डेले शुरुवातदेखि नै फोहोरमैलाको समस्यासंग आफूहरु जुधिरहेको बताए ।‘तीन महिनापछि समस्या केही हदसम्म समाधान होला ’ उनले भने ,‘तर अब साउनदेखि तीन महिना के गर्ने हो भन्ने समस्या छ ।’

नगर उपप्रमुख नगेन्द्रप्रसाद संग्रौलाले बिर्तामोडको फोहोरमैला बिर्तामोडबासीका लागि साझा समस्या भएको बताए । २०७४ सालमा कार्यविधि नै बनाएपनि यो समस्याको समाधान गर्न नसकिएको उनले बताए । खुल्ला जमिन नभएको बिर्तामोडमा फोहोर व्यवस्थापनका लागि स्थानीय जनताले पनि सहयोग नगरेको उनले गुनासो गरे ।आगामी कात्तिक मसान्तसम्म फोहोरमैलाको समस्या हट्नसक्ने उनको भनाई छ । पूर्वकै मुख्य शहरको रुपमा विकसित हुँदै आएको बिर्तामोडमा प्रत्येक दिन १० ट्रयाक्टर फोहोर संकलन हुने गरेको छ ।

प्रतिक्रिया

कृपया प्रतिक्रिया लेख्नुहोस्!
कृपया आफ्नो नाम लेख्नुहोस्