बिर्तामोड, असोज १ । शिक्षा शिकोप निकेतनले शुक्रवार बालबालिकाहरुको आँखा जाँच गराएको छ ।
शिक्षा बहुउद्देश्यीय सहकारी संस्थाको व्यवस्थापन र दृष्टि आँखा अस्पतालको प्राविधिक सहयोगमा निकेतनले बालबालिकाको आँखा जाँच गराएको हो ।
शिक्षा शिकोप निकेतनकी प्रिन्सिपल रेश्मा घिमिरेका अनुसार ४८ जना बालबालिकाको आँखा जाँच गरिएको छ । जाँच गरिएकामध्ये दुई जना बालबालिकाको आँखामा समस्या देखिएको प्रिन्सिपल घिमिरेले बताइन् ।
बालबालिकामा आँखाको संक्रमण हुनसक्ने र समयमा पहिचान गर्नसके थप जोखिम नहुने भएकाले परीक्षण व्यवस्थापन मिलाइएको शिक्षा बहुउद्देश्यीय सहकारी संस्थाका अध्यक्ष सुब्रत न्यौपानेले बताए ।
दृष्टि आँखा अस्पतालका तर्फबाट नेत्ररोग विशेषज्ञ अजितकुमार ठाकुर र रीना फियाकले बालबालिकाको आँखा परीक्षण गरेका थिए । ठाकुरका अनुसार मोवाइल अत्यधिक हेर्ने बालबालिकामा आँखाको समस्या धेरै देखिने गरेको छ ।
