झापा, असोज १७ । बिर्तामोड बसपार्कमा दशैंको मौका छोपेर यात्रुहरुबाट बढी भाडा असुल्ने ७ वटा यात्रुवाहक सवारीसाधनलाई ट्राफिक प्रहरीले कार्बाही गरेको छ ।
![](https://pratidindaily.com/wp-content/uploads/2022/10/Capture51.jpg)
बिर्तामोडबाट इलामलगायत पहाडी क्षेत्रतर्फ जाने साना सवारीसाधनलाई कार्वाही गरिएको जिल्ला ट्राफिक प्रहरी कार्यालय बिर्तामोडका प्रमुख प्रहरी निरीक्षक अशोक जवेगुले बताए । काउन्टरमा टिकट काट्न नदिई निर्धारित भन्दा बढी भाडा असुल्ने , रिजर्भमा मात्र जान खोज्ने सवारीसाधनलाई कार्वाही गरिएको उनले बताए । कतिपय सवारीसाधनबाट असुलिएको बढी भाडा यात्रुलाई फिर्ता गराएको समेत जवेगुले जानकारी दिए । बिर्तामोड बसपार्कमा दशैंमा इलाम फर्किने यात्रुलाई सवारीसाधनहरुले धेरै दुःख दिएको गुनासो छ ।
रिजर्भ भए जाने, नभए नजाने सर्त चालकले राख्ने , बिर्तामोडदेखि इलामसम्मको भाडादर रु ४३० रहेकोमा १००० भाडा माग्नेजस्ता समस्या यात्रुहरुले भोगेका छन् । सवारीसाधनहरुले रु ४३० को ठाउँमा ५०० असुलिरहेको यात्रुहरुले बताएका छन् ।बढी भाडा लिने सवारीलाई ५०० देखि एक हजारसम्म जरिवाना गरिएको छ ।
चाडबाडमा यात्रुहरु समस्यामा नपरुन् र नठगिउन् भनेर जिल्लाका १२ ठाउँमा यात्रु सहायता कक्ष स्थापना गरिएको छ । काँकरभिट्टा , धुलावारी , चारआली, बुधवारे ,बिर्तामोड बसपार्क , लक्ष्मीपुर,सुरुङ्गा , झिलझिले,केर्खा , दमकलगायतका स्थानमा यात्रु सहायता कक्ष स्थापना गरिएको प्रहरी निरीक्षक जवेगुले बताए । यात्रुहरुलाई सुरक्षित गन्तव्यसम्म यात्रा गराउन चार सिफ्टमा ट्राफिक प्रहरीले चेकजाँच गरिरहेको छ । बिहान ७ देखि १० , ११ देखि दिउँसो २ , ३ देखि साँझ ६ र ७ देखि राति १० बजेसम्म चेकजाँच गरिरहेको जवेगुको भनाई छ ।