झापा, कात्तिक २९ । मोरङको रंगेली नगरपालिका-४ मा सडक छेउबाट सुन र चाँदीका गहनासहित तीनजना भारतीयलाई प्रहरीले पक्राउ गरेको छ ।
पक्राउ पर्नेहरूमा भारतको अररिया कौवाकोह-४ बस्ने २८ वर्षीय कुमार यादव, अररिया कौवाकोह-३ बस्ने २५ वर्षीय सुरजकुमार यादव र सोही ठाउँ बस्ने ३५ वर्षीय राजेशकुमार यादव रहेका छन् । उनीहरुको साथबाट १ तोला ४ आना ४ लाल सुनको एकथान नेक्लेस र एक जोर बाला, औंठीसहितको पन्जा एक जोर, एक जोर पाउजु र एक थान सिक्री गरी करिब ३१ तोला चाँदी बरामद गरिएको प्रहरीले जनाएको छ । भारतबाट नेपालतर्फ आउँदै गरेको तत्काल नम्बर नखुलेको ३ जना सवार मोटरसाइकललाई ईलाका प्रहरी कार्यालय रंगेलीबाट खटिएको प्रहरीले रोक्न खोज्दा मोटरसाइकलमा सवार व्यक्तिले प्लाष्टिकको झोला सोही स्थानमा फाली फरार भएका थिए । झोला तलासी गर्दा उक्त परिमाणको सुन तथा चाँदीको गरगहना फेला पारेको थियो । त्यसपछि मोटरसाइकलसहित फरार भएका व्यक्तिहरूको खोजी गर्ने क्रममा रंगेली नगरपालिका-४ चोप्राह बोडर छेउबाट बिआर ३८ जेड १८८० नम्बरको मोटरसाइकलसहित घटनामा संलग्न उनीहरूलाई फेला पारी प्रहरीले पक्राउ गरेको हो ।
