झापा, पुष १३ ।इलामको रोङ गाउँपालिकाले आज स्थानीय सार्वजनिक बिदा दिएको छ ।
गाउँपालिकामा लोपोन्मुख लेप्चा जातिको नयाँ वर्ष अर्थात् नामवन पर्वको अवसरमा गाउँपालिकाले आज स्थानीय बिदा दिएको हो ।
गाउँकार्यपालिकाको कार्यालय, वडा कार्यालय, गाउँपालिकाभित्रका शिक्षण संस्था तथा सम्पूर्ण सार्वजनिक निकायहरू आकस्मिक सेवाबाहेक बिदा दिइएको प्रमुख प्रशासकीय अधिकृत दीपेन्द्र दाहालले जनाएका छन् । लेप्चा समुदायले नयाँ वर्ष अर्थात् नामवन पर्वको उपलक्ष्यमा हरेक वर्ष रोङले बिदा दिँदै आएको छ ।
रोङमा लोपोन्मुख लेप्चा समुदायको बाक्लो बसोबास छ । २०६८ सालको जनगणनाअनुसार नेपालमा लेप्चाको जनसंख्या ३ हजार ४४५ छ । पछिल्लो समय उनीहरूमध्ये केही अस्थायी बसोबासका लागि र कतिपय बसाइँ सरेर अन्यत्र गइरहेका छन्। त्यस्तै सूर्योदय नगरपालिकाले पनि लोपोन्मुख लेप्चा जातिको नयाँ वर्ष अर्थात् नामवन पर्वको अवसरमा आज सार्वजनिक बिदा दिएको छ।
