झापा ,माघ १२ । । अभिनेता नाजिर हुसैनको मुख्य भूमिका रहेको फिल्म ‘गुलाबी’ को फष्टलुक सार्वजनिक गरिएको छ ।
बिहीबार सरस्वती पूजाको अवसर पारेर निर्माण युनिटले फिल्मको एक पोष्टर फष्टलुकको रूपमा ल्याएको हो । पोष्टरमा अभिनेता नाजिर ट्रान्सजेन्डर महिलाको लुक्समा देखिएका छन् । लुक्स हेर्दा फिल्ममा उनको अभिनय कस्तो रहेको छ भनेर अनुमान लगाउन गाह्रो पर्दैन । फिल्ममा नाजिरसँग सुशील सिटौला, सञ्चिता लुइँटेल, राजा घोष, विशाल पहारी, अनुपम श्रेष्ठ ‘हटी नटी’ लगायतको मुख्य भूमिका छ । फिल्म धम्पुस, पोखरा र काठमाडौँमा छायाङ्कन गरिएको छ । पटकथा तथा संवाद रामकुमार श्रेष्ठ र नाजिर हुसैनको रहेको फिल्म समुन्द्रले निर्देशन गरेकी हुन् । फिल्मले पारलैङ्गिकताको कथा प्रस्तुत गर्ने निर्देशक भट्टले बताइन् । क्यानडाको टोरन्टो फिल्म स्कुलबाट निर्देशन कक्षा लिएर नेपाल फर्केकी निर्देशक भट्टले केहि वर्ष पहिले ‘आधा पेज’ नामको फिल्म निर्देशन गरेकी थिइन् । केहि वर्षको अन्तरपछि भट्ट पुनः फिल्म निर्देशनमा फर्किएकी हुन् । दि स्काइ ओसन इन्टरटेन्मेन्टको ब्यानर र अनुपम फिल्मस्सँगको सहकार्यमा निर्माण भएको ‘गुलाबी’का छायाकार आलोक शुक्ला हुन् । फिल्मको प्रदर्शन मिति जुर्न बाँकी रहेको छ ।
