झापा , चैत्र १३ । नेकपा माओवादी केन्द्रका नेताहरुले गृह र सूचना तथा सञ्चार प्रविधि मन्त्री मन्त्रालय पार्टीले नै राख्नुपर्ने बताएका छन् ।

नेताहरूले मन्त्रालय भागबन्डा हुँदा यी दुई मन्त्रालय पार्टीले नै राख्नुपर्ने बताएका हुन् । पार्टीको शनिबार बसेको पदाधिकारी बैठकमा नेताहरूले गृह र सञ्चार मन्त्रालय पार्टीले नै राख्नुपर्ने भन्दै प्रचण्डलाई दबाब दिएका थिए । ती मन्त्रालय कांग्रेसले दाबी गरेको चर्चा चल्न थालेपछि नेताहरूले प्रचण्डलाई दायाबायाँ नगर्न दबाब दिएका हुन्। त्यसपछि प्रचण्डले भागबन्डा हुँदा गृह र सञ्चार तथा सूचना प्रविधि मन्त्रालय पार्टीले नै पाउनुपर्ने पक्षमा आफू रहेको बताएका थिए । प्रचण्डले आफूले सोहीअनुसार कांग्रेससहित गठबन्धन दलमा छलफल गर्ने आश्वासन दिएको पनि एक नेताले बताए । प्रचण्डले गृह आफ्नो पार्टीले राखेर अर्थ मन्त्रालय कांग्रेसलाई दिन सकिने विषयमा ब्रिफिङ गरेको पनि ती नेताको भनाइ छ । यस्तै ती नेताका अनुसार अहिले भएका मन्त्रीमा थप नभएमा भौतिक यातायात तथा पूर्वाधारमन्त्री मन्त्री नारायणकाजी श्रेष्ठ नै गृहमन्त्री हुने सम्भावना देखिएको छ । यदि माओवादीको भागमा एक मन्त्रालय थप भएमा शक्तिबहादुर बस्नेत, महेन्द्रबहादुर शाही र पूणर्बहादुर घर्तीमध्येबाट एकजना जाने सम्भावना रहेको उनको भनाइ छ । हाल सञ्चार मन्त्री माओवादीकै भागमा परेको छ । सो मन्त्रालयमा हाल रेखा शर्मा रहेकी छन् । सो मन्त्रालयमा उनले नै निरन्तरता पाउने बताइएको छ । यस्तै सङ्घीय मामिला तथा सामान्य प्रशासन मन्त्री अमनलाल मोदीले आफ्नो मन्त्रालय फेरिदिन प्रचण्डलाई आग्रह गरेको स्रोतको भनाइ छ । उनले भौतिक वा सहरी विकास मन्त्रालयमा आफ्नो रुचि राख्दै आएका छन् ।

प्रतिक्रिया

कृपया प्रतिक्रिया लेख्नुहोस्!
कृपया आफ्नो नाम लेख्नुहोस्