झापा, बैशाख ४ । नेपाली कांग्रेस बिर्तामोड–२ नं. वडा समितिले पार्टीका तीनजना अग्रज ब्यक्तित्वलाई सम्मान गरेको छ ।
वडा पार्टी कार्यालयले पार्टीका अग्रज ब्यक्तित्व डिल्लीप्रसाद सिटौला, कृष्णप्रसाद मिश्र र पूर्णानन्द शर्मालाई सम्मान गरेको हो ।
वडा पार्टीले सोमवार बिर्तामोड–२ स्थित चारपानेमा नव वर्ष २०८० को अवसरमा आयोजना गरेको शुभकामना आदान–प्रदान कार्यक्रममा उनीहरुलाई सम्मान गरेको हो । नेपाली कांग्रेस बिर्तामोड वडा नं. २ का सभापति देवीप्रसाद खरेलको सभापतित्वमा भएको शुभकामना आदान–प्रदान तथा सम्मान कार्यक्रममा प्रमुख अतिथि पूर्वमन्त्री केशवकुमार बुढाथाकी, संबिधानसभा सदस्य सुधिरकुमार शिवाकोटीलगायतले अग्रज ब्यक्तित्वहरुलाई सम्मान गरेका थिए ।
पार्टीका क्षेत्रीय प्रतिनिधि देवीप्रसाद गिरीले स्वागत तथा कार्यक्रमको औचित्यमाथि प्रकाश पारेको कार्यक्रममा प्रमुख अतिथि पूर्वमन्त्री बुढाथोकी, संविधानसभा सदस्य शिवाकोटी, सम्मानित ब्यक्तित्व डिल्लीप्रसाद सिटौला, कृष्णप्रसाद मिश्र, पार्टीका जिल्ला उप–सभापति केशवराज पाण्डे, जिल्ला सदस्य पार्वता गिरीलगायतले शुभकामना मन्तब्य राखेका थिए ।
कार्यक्रमका वक्ताहरुले पार्टीभित्रको अन्तरद्वन्द्व अन्त्य गर्दै पार्टी र पार्टीका भ्रातृ संगठनलाई चलायमान बनाउनु पर्नेमा जोड दिए । उनीहरुले कांग्रेसका नेता तथा कार्यकर्ताहरु छिटो विचलित हुने गरेको बताउँदै पार्टीको अन्तरद्वन्द्वबाट विचलित नहुन नेता तथा कार्यकर्तालाई आग्रह समेत गरेका छन् ।
कार्यक्रममा क्षेत्रीय प्रतिनिधि धर्म लक्सम्बा, वडा सचिव रुपनारायण ढकाल र तेजकुमार सुब्बाले सम्मानपत्र वाचन गरेका थिए । कार्यक्रममा महाधिवेशन प्रतिनिधि जलकुमार गुरुङ, यज्ञप्रताप अधिकारी, प्रदेश सदस्य रञ्जिता कार्की, झापा सचिव कृष्ण हुमागाँई, बिर्तामोड नगर सभापति भोजराज सिटौला, बिर्तामोड–४ पूर्व वडाध्यक्ष कुलप्रसाद संग्रौलालगायतको उपस्थिति रहेको थियो ।
