झापा, जेठ ८ । नेपाली राष्ट्रिय महिला फुटबल टोलीकी फरवार्ड सावित्रा भण्डारी ‘साम्बा’ इण्डियन वुमन्स लिग फुटबलमा सर्वाधिक गोलकर्ता बनेकी छिन्।
![](https://pratidindaily.com/wp-content/uploads/2023/05/sports-9.jpg)
गएराति सम्पन्न लिगमा सावित्रा सम्मिलित टोली गोकुलम् केरलाले उपाधि जित्दा सावित्राले सर्वाधिक गोलकर्ताको उपाधि जितेकी हुन्। प्रतियोगितामा भएका १० खेलमा सावित्राले गोकुलम्का लागि सर्वाधिक ३० गोल गरेकी छिन् । उनले सर्वाधिक गोलकर्ताको रूपमा भारु एक लाख पुरस्कार प्राप्त गरिन् । गएराति भएको फाइनल खेलमा किकस्टार्ट एफसी कर्नाटकाविरुद्ध जित निकाल्दा पनि सावित्राले गोल गरेकी थिइन् । साथै उनले दुई गोलका लागि असिस्टसमेत गरिन्। किकस्टार्टमा नेपाली राष्ट्रिय टोलीका दुई सदस्य सरु लिम्बू र रेनुका नगरकोटी आबद्ध थिए ।