भद्रपुर, जेठ २३ । झापाको पहिलो नगरपालिका भद्रपुरले स्थानीय विषयवस्तु समेटर पाठ्यक्रम तयार पारेर लागू गरेको छ ।
स्थानीय सरकार सञ्चालन ऐन २०७४ ले दिएको अधिकार प्रयोग गरी स्थानीय जाति, भाषा, भूगोल, संस्कृति, पर्यटकीय क्षेत्रलगायतका विषय समेटेर पाठ्यक्रम तयार गरी यस शैक्षिक वर्षबाट लागू गरेको हो ।
नगरपालिकाले चालू शैक्षिक सत्रमा कक्षा १ देखि ८ सम्म ‘भद्रपुरको सेरोफेरो’ विषयमा स्थानीय पाठ्यक्रम तयार गरेर पठनपाठन सुरु गरेको छ ।पाठ्यक्रम ७ वटा क्षेत्र समेटेर तयार पारिएको छ । जसमा भद्रपुरको भौगोलिक अवस्था, प्राकृतिक सौन्दर्यता, नदी, खोला, तालतलैया, मठमन्दिरहरू, धार्मिक ऐतिहासिक स्थलको परिचय, नैतिक आचरण, योग शिक्षा तथा नगरपालिकाको बारेमा विविध जानकारी समेटिएको छ ।
नगर शिक्षा शाखाका कर्मचारी योगेन्द्र पौडेलका अनुसार स्थानीय स्रोत साधन र स्थानीय परिवेश सुहाउँदो विषयवस्तु समेटेर पाठ्यक्रम तयार गरिएको हो । यस वर्ष पाठ्यक्रम मात्र लागू गरिएको भन्दै पौडेलले आगामी शैक्षिक वर्षबाट भने पाठ्यपुस्तक समेत तयार पारेर पठाइने जानकारी दिए ।
उनले केन्द्रीय पाठ्यक्रमले नसमेटेका विषयसँगै नैतिक शिक्षा, जीवन उपयोगी शिक्षा, धार्मिक ऐतिहासिक, सांस्कृतिक र भौगोलिक पहिचान, पर्यटकीय स्थल जस्ता विषयहरु पाठ्यक्रममा समावेश गरिएको बताए । पौडेलले अहिले परीक्षण चरणमा भएकाले तत्काल पुस्तक नछापेर परीक्षणका रूपमा पाठ्यक्रम लगाउँदै सुझाव र प्रतिक्रियाको चरणमा रहेको बताए ।
