कुमरखोद, असार १३। झापा गाउँपालिकाले बुधवारदेखि भूमिहीनहरुलाई जग्गाको निस्सा वितरण शुरु गरेको छ ।
ऐलानी जग्गा उपभोग गरिरहेका भूमिहीनहरुले जग्गाको निस्सा पाउन थालेका हुन् । राष्ट्रिय भूमि आयोगसँग भएको सम्झौताबमोजिम झापा गाउँपालिकाले भूमिहीन दलित , भूमिहीन सुकुम्वासी र अव्यवस्थित बसोबासीलाई जग्गाको निस्सा वितरण शुरु गरेको हो । बुधवार झापा गाउँपालिकाले वडा नं १ देखि जग्गाको निस्सा वितरण शुरु गरेको हो । वडा नं १ मा ८३३ परिवारलाई जग्गाको निस्सा वितरण गरिएको छ । जग्गाको निस्सा पाएपछि भूमिहीनहरु खुशी भएका छन् । वडा नं १ का इस्राईल मियाले आफूले जोतभोग गर्दै आएको १ विगाह जग्गाको निस्सा पाएपछि खुशी भएको बताए । उनले भने, ‘अब पक्कै जग्गाको लालपूर्जा पाउने भएँ ।’
झापा गाउँपालिकाले रेडक्रस सामुदायिक भवनमा आयोजना गरेको निस्सा वितरण कार्यक्रममा सहारा नेपाल साकोस र ह्याविटेट फर ह्युमानिटी नेपालले सहयोगीको भूमिका निभाएका थिए । निस्सा वितरण कार्यक्रमका प्रमुख अतिथि राष्ट्रिय भूमि आयोग झापाका अध्यक्ष तिलकसिंह पाण्डेले ऐलानी जग्गा ६ कठ्ठासम्म जोतभोग गरिरहेका सुकुम्वासीले लालपूर्जा बनाउन सरकारी राजश्व नतिर्नु पर्ने बताए । ६ कठ्ठाभन्दा बढी चर्चेका व्यक्तिले भने राजश्व तिनुपर्ने उनले बताए । तीन पुस्तासम्म कुनै व्यक्तिको १ कठ्ठासम्म जग्गाको धनीपूर्जा छ भने ती व्यक्ति सुकुम्वासीमा गन्ती नआउने पाण्डेको भनाई थियो ।
कार्यक्रमको अध्यक्षता गरेका झापा गाउँपालिका अध्यक्ष जयनारायण शाहले ऐलानी जग्गा वर्षौवर्षदेखि उपभोग गर्दै आएपनि लालपूर्जाविहीनहरु अव जग्गाको मालिक बन्ने पहिलो प्रक्रिया शुरु भएको बताए । निस्सा वितरण गर्दै उनले भने, ‘तपाईहरुले ऐलानी जग्गा उपभोग गरिरहनु भएको छ त्यसको प्रमाण दिएका छौ र केहि दिनपछि नापी गर्न तपाईको घरआँगन पठाउने र नापजाँच भईसकेपछि लालपूर्जा दिन्छौं ।’
निस्सा वितरण कार्यक्रममा वडा अध्यक्ष राजकुमार यादव, सहारा नेपालका उपाध्यक्ष सोमनाथ तिम्सिना , ह्याविटेट फर ह्युमानिटी नेपालका रामबहादुर श्रेष्ठ लगायतले शुभकामना मन्तव्य दिएका थिए । कार्यक्रममा वडा नं १ अध्यक्ष हिमालकुमार चम्लागाई , राजनैतिक दलका प्रतिनिधि तथा स्थानीयवासीहरुको सहभागिता रहेको थियो ।
उपाध्यक्ष अन्जुदेवी थपलियाले स्वागत मन्तव्य राखेको कार्यक्रमको संचालन वडा नं १ का सचिव नारायण चम्लागाईले गरेका थिए ।
