झापा, भदौ १८ । एसिया कप क्रिकेटअन्तर्गत समूह चरणको दोस्रो खेलमा नेपालले आज अर्को महारथी टोली भारतसँग खेल्दैछ।
अन्तर्राष्ट्रिय क्रिकेट यात्रा सुरु गरेको २७ वर्षपछि नेपालले भारतविरुद्ध खेल्ने अवसर पाएको हो। श्रीलंकाको क्यान्डीमा हुने खेल नेपाली समय अनुसार दिउँसो सवा ३ बजे सुरु हुनेछ । डेब्यू खेलमा पाकिस्तानसँग २ सय ३८ रनको फराकिलो हार व्यहोरेको नेपाल दोस्रो खेलमा भारतविरुद्ध अविश्वसनीय नतिजा निकाल्दै सुपर फोरमा पुग्न चाहन्छ।
एसिया कपको सदाबहार दाबेदार भारतले आफ्नो पहिलो खेलमा चीरप्रतिद्वन्द्वी पाकिस्तानसँग अंक बाँड्दै अर्को चरणमा पुग्ने सम्भावना बलियो बनायो। अब भारतले दोस्रो खेलमा नेपालसँग खेल्न लागेको हो। उमेर समूहमा पटक पटक खेलिसके पनि सिनियर टोलीमा यी दुईबीच पहिलो खेल हुन लागेको हो। अब समूह ए मा नेपाल र भारतबीचको खेलको विजेता अर्को चरणमा पुग्नेछ।
एसिया कप खेल्दै गरेका ६ टोलीमध्ये सबैभन्दा कमजोर टोली नेपालले भारतविरुद्ध अकल्पनीय नतिजा निकालेको खण्डमा त्यो नेपाली क्रिकेटका लागि अर्को ऐतिहासिक दिन हुनेछ।
सन् २०१७ मा एसिसी यु १९ एसिया कपमा नेपालले भारतलाई १७ रनले हराएको थियो। त्यस समयमा पनि समूह ए मा भारतलाई हराउँदै नेपालले दोस्रो चरणमा स्थान बनाएको थियो।
अहिले पनि त्यस्तै समीकरण छ। त्यस ऐतिहसिक जितका ६ जना खेलाडी दीपेन्द्रसिंह ऐरी, रोहित पौडेल, भिम सार्की, सन्दीप लामिछाने, आसिफ शेख र किशोर महतो यस पटक पनि टोलीमा छन्।
पाकिस्तानविरुद्ध बलिङमा शानदार सुरुवात गरे पनि लय कायम राख्न नसक्दा नेपालले इतिहासकै सर्वाधिक ठूलो ३ सय ४३ रनको लक्ष्य पायो। पाकिस्तानी पेसर बलर सामु टिक्न नसक्दा नेपाल १ सय ४ रनमै खुम्चियो। क्यान्डीमा भारतले हालसम्म खेलेका ४ खेलमध्ये ३ मा जित र १ खेल वर्षाले रद्द भएको छ। ती ३ वटै जितमा उसले घरेलु टोली श्रीलंकालाई हराएको थियो।
त्यसैले पाकिस्तानविरुद्ध १ अंक बाँडे पनि भारत खासै दबाबमा भने छैन। ७ पटकको विजेता भारत पछिल्ला १५ संस्करणमा ९ पटक फाइनल खेलेको छ। वर्षाको कारण रद्द भएको खण्डमा भने भारत २ अंकका साथ सुपर फोरमा पुग्नेछ।
पछिल्लो ५ खेलमा २ जित र २ हार व्यहोर्दा भारतको १ खेल रद्द भयो। नेपालले भने पछिल्लो ५ मध्ये १ खेलमात्र जित्दा ४ खेल गुमाएको छ।
