बिर्तामोड, भदौ १८ । बढ्दो लागूऔषध दुर्व्यसन न्यूनीकरण गर्नका लागि बिर्तामोड नगरपालिकाले सचेतना कार्यक्रममा जोड दिएको छ ।
केही समयदेखि विभिन्न सचेतनामूलक कार्यक्रम गर्दै आएको नगरपालिकाले आज नगरका सबै जनप्रतिनिधिहरुलाई लागूऔषध दुर्व्यसनका बारेमा जानकारी दिएको छ । पुनर्जन्म समूह , नारी संचार गृह र समुन्नत नेपालको सहयोगमा नगरका जनप्रतिनिधिहरुलाई एकदिने अभिमुखीकरण दिइएको हो । कार्यक्रममा पुनर्जन्म समूहका राजु गिरी , नारी संचार गृहकी सावित्रा दाहाल र समुन्नत नेपालकी कोपिला बस्नेतले सहजीकरण गरेका थिए । नगर उपप्रमुख नगेन्द्रप्रसाद संग्रौलाको अध्यक्षतामा भएको कार्यक्रमको प्रमुख अतिथि रहेकी नगर प्रमुख पवित्रा महतारा प्रसाईले सीमानाकामा खाद्यान्न ल्याउन कडाइ गरिरहँदा कसरी दिनहुँ लागूऔषध भित्रिन्छ भनेर आश्चर्य मान्दै सीमानाकामै लागूऔषध आपूर्ति गर्न रोक्नुपर्नेमा जोड दिइन् । उनले भयावह रुपमा बढ्दै गएको लागूऔषध दुर्व्यसनको समस्यालाई न्यूनीकरण गर्न सबै तह तप्काका व्यक्तिहरुले हातेमालो गर्नुपर्ने बताइन् ।
कार्यक्रममा जनप्रतिनिधिहरुसंगै प्रमुख प्रशासकीय अधिकृत विनोदकुमार न्यौपाने , शिक्षा शाखा प्रमुख तिलचन भण्डारी , इलाका प्रहरी कार्यालय बिर्तामोडका डीएसपी सुरज कार्कीलगायतको उपस्थिति रहेको थियो ।नारी संचार गृहकी अध्यक्ष रेजिना गौतमले स्वागत गरेको कार्यक्रमको संचालन नगरपालिकाका वरिष्ठ कार्यक्रम अधिकृत जय तिम्सिनाले गरेका थिए ।
बिर्तामोडमा करिव ३२ सय जना लागूऔषध प्रयोगकर्ता रहेको अनुमान गरिएको छ । नगरको वडा नं ५ , ४ र १ मा धेरै दुर्व्यसनी रहेको कार्यक्रममा जानकारी दिइएको थियो ।
