दमक , असोज ५ । झापा दमकस्थित मेची बहुउद्धेश्यीय सहकारी संस्थाका कर्जा अधिकृत मेघराज राउत बिहीबार अपरान्ह एक होटलमा मृत फेला परेको घटनामा अनुसन्धान गर्न प्रहरीले एक जना महिलालाई नियन्त्रणमा लिएको छ ।
![](https://pratidindaily.com/wp-content/uploads/2023/09/meghraj-raut-1024x576-1.jpg)
जिल्ला प्रहरी कार्यालय झापाका डीएसपी खगेन्द्रप्रसाद रिजालका अनुसार प्रहरीले राति साढे ९ बजे ती महिलालाई नियन्त्रणमा लिएको हो । उनले घटनाबारे थप अनुसन्धान भइरहेको जनाएका छन् । प्रहरीले महिलाका बिषयमा थप केही खुलाएको छैन । ३७ बर्षिय राउत बिहीबार बिहान करिब ९ बजेदेखि एकाएक घरपरिवार र कार्यालयको सम्पर्क बाहिर थिए । उनी सँधै कार्यालय आउने समयमा कार्यालय नआएपछि परिवारसँग बुझ्दा घरमा समेत थिएनन् । त्यसपछि आन्तरिक रुपमा खोजी भइरहेको थियो । प्रहरीले राउतले प्रयोग गर्दै आएको मोवाइल फोनबाट लोकेशन ट्रयाक गर्दै दमक ५ स्थित मंगलदिप मार्केट र इलाका ट्राफिक प्रहरी कार्यालय दमकको मध्यभागमा रहेको अन्नपूर्ण होटल एण्ड लजको तेस्रो तलामा पुगेको थियो । त्यहाँ उनी बन्द कोठाभित्र फेन झुन्ड्याउने फलामको हुकमा डोरीको पासो लगाएको अवस्थामा मृत भेटिएका थिए ।
![](https://pratidindaily.com/wp-content/uploads/2023/09/381064247_789552602923960_6644376523964508515_n-768x363-1.jpg)
मृतकले आत्महत्या गर्नुअघि ‘सु–साईड नोट’ समेत लेखेर छोडेकोले त्यसबारेमा अनुसन्धान सुरु गरिएको इलाका प्रहरी कार्यालय दमकका डीएसपी मनोजकुमार लामाले बताए । ‘आत्महत्या दुरुत्साहन गर्ने व्यक्ति तथा समूहको नजिकबाट पहिचान गरिरहेका छौ परिवारबाट जाहेरी आउनेबित्तिकै हामी पक्राउ गर्छाै ’ डीएसपी लामाले भने ।राउतकी श्रीमती र नाबालिका छोरी रहेका छन् ।