झापा, असोज २६ । बिर्तामोड वडा नम्बर ६ चौंथो वडास्तरीय नकआउट फुटबल प्रतियोगिताको क्वाटरफाइनलमा प्रवेश गरेको छ ।
बिर्तामोडको डोमालाल राजवंशी रंगशालामा आज भएको खेलमा बिर्तामोड वडा नम्बर ९ लाई १–० गोल अन्तरले पराजित गर्दै बिर्तामोड–६ क्वाटरफाइनलमा प्रवेश गरेको हो ।
बिर्तामोड–६ का लागि नरेश तामाङको प्रहार गोलमा परिणत भएको थियो । ४१ औं मिनेटमा उनले गरेको प्रहार डि–एरियाभित्र रहेका बिर्तामोड–९ का खेलाडीलाई टच गर्दै ‘अन गोल’ भएको थियो । निर्धारित ७० मिनेटको खेलको पहिलो हाफमा दुवै टोलीले गोल गर्न सकेनन् । दोस्रो हाफको सुरुवाती ६ मिनेटमा अग्रता बनाएको बिर्तामोड–६ ले खेलमा थप गोल गर्न भने सकेन ।
खेलको ५८ औं मिनेटमा रेडकार्ड पाएपछि बिर्तामोड–९ का टिम कप्तान राम मर्डी मैदान बाहिरिएका थिए । दोहोर पहेलो कार्ड पाएका उनले ५८ औं मिनेटमा विपक्षी गोलकिपरलाई फल्ट गरेका थिए । उनले खेलको ४५ औं मिनेटमा पहिलो पहेँलो कार्ड पाएका थिए । १० खेलाडीमा समेटिएको बिर्तामोड ९ ले सुधारिएको प्रदर्शन गरेपछि थप गोल खानबाट भने बचेको थियो ।
खेलमा उत्कृष्ट प्रदर्शन गरेका बिर्तामोड ६ का सिदार्थ अधिकारीे ‘म्यान अफ दि म्याच’ चुनिए । उनले नगद १५ सय पुरस्कार पाए । उनलाई राष्ट्रियसभाका पूर्वसदस्य हरिचरण शिवाकोटी र आयोजक समितिका अध्यक्ष विकास गिरीले पुरस्कार प्रदान गरेका थिए ।
बिर्तामोड नगर खेलकुद विकास समितिको आयोजनामा भइरहेको प्रतियोगिताको विजेताले नगद १ लाख र उपविजेताले ५० हजार रुपैयाँ र मेडल, ट्रफी तथा प्रमाण–पत्र प्राप्त गर्ने छ । प्रतियोगितामा भोलि बिर्तामोड वडा नम्बर ५ र वडा नम्बर ७ बीच खेल हुने आयोजक समितिका सचिव बिशन लिम्बूले जानकारी दिए । प्रतियोगिताको फाईनल खेल कात्तिक २ गते हुने छ ।
