झापा,असोज २५ । पूर्वमन्त्री तथा नेकपा एमालेका पोलिटव्युरो सदस्य महेश बस्नेत आउने कार्यक्रममा झडप हुने संभावना बढेपछि सुरक्षा व्यवस्था कडा पारिएको छ ।
![](https://pratidindaily.com/wp-content/uploads/2023/10/mahesh-basnet-1024x560.jpg)
राष्ट्रिय युवा संघ अर्जुनधारा नगर कमिटीको प्रथम नगर अधिवेशनलाई उद्घाटन गर्न बस्नेत आउन लागेका हुन् । उनीसंगै युवा संघका अध्यक्ष क्षितिज थेबे पनि आउने भएका छन् । राजधानीको एक होटलमा बीएण्डसी हस्पिटलका संचालक दुर्गा प्रसाईलाई कालोमोसो दलेपछि प्रसाई पक्षधरहरुले बस्नेतलाई टार्गेट बनाएका छन् । प्रसाईले आफूमाथि भएको दुर्व्यवहारको बदला लिने चेतावनी दिएका छन् ।
त्यस्तै प्रदेश नं. १ पुनः नामांकन संयुक्त संघर्ष समितिले पनि बस्नेतको कार्यक्रममा अवरोध गर्ने चेतावनी दिएको छ । बस्नेतको कार्यक्रममा कालो झण्डासहित शान्तिपूर्ण विरोध प्रदर्शन गर्ने कार्यक्रम रहेको संघर्ष समितिका सदस्य सचिव सेसेहाङ् फियाक लिम्बूले बताए ।
बस्नेतको कार्यक्रममा अप्रिय घटना हुन नदिन सुरक्षा व्यवस्था कडा पारिएको जिल्ला प्रहरी कार्यालयले जनाएको छ ।‘ अप्रिय घटना हुन नदिन र शान्ति सुरक्षा व्यवस्था कायम गर्न नेपाल प्रहरी र सशस्त्र प्रशरी तैनाथ गरिएको जिल्ला प्रहरी कार्यालयका डीएसपी खगेन्द्रप्रसाद रिजालले बताए । बढ्दो असुरक्षाका कारण बस्नेतलाई ल्याउने कार्यक्रम आयोजकले स्थगित गर्न लागेका थिए । तर, त्यसबाट एमाले डराएको सन्देश जाने भएकाले बस्नेतलाई ल्याएरै छाड्ने अडानमा पार्टी पुगेको हो । दुर्गा प्रसाई र पहिचानवादीहरुलाई आफूहरुको कार्यक्रममा अवरोध नगर्न भनेर आग्रहसहितको चेतावनी दिइएको एमाले अर्जुनधाराका नगर सचिव लवकुश गौतमले बताए ।