झापा, कात्तिक ४ । शनिश्चरे फुटबल क्लब अर्जुनधाराले प्रथम लक्ष्मीधाम जिल्लास्तरीय नकआउट फुटबल प्रतियोगिताको उपाधि जितेको छ ।
अर्जुनधारा–११ स्थित लक्ष्मीधाप खेलमैदानमा शनिबार सम्पन्न फाइनल खेलमा न्यूस्टार फुटबल क्लब बुट्टाबारीलाई ४–० गोल अन्तरले पराजित गर्दै शनिश्चरेले उपाधि जित्न सफल भएको हो ।
शनिश्चरेको जितका लागि खेलको ४१औं, ६१औं र ६२औं मिनेटमा गोल गर्दै निमा तामाङले ह्याट्रिक गरेका थिए । अर्को एक गोल खेलको ४३औं मिनेटमा पूजन राईले गरेका थिए ।
स्थानीय लक्ष्मीधाप स्पोर्टस क्लब आयोजक र युवा तथा खेलकुद समिति सहआयोजक रहेको प्रतियोगिताका विजेता र उपविजेता टिमलाई नगद पुरस्कार क्रमशः ५१ हजार र ३१ हजारसहित ट्रफी र मेडल प्रदान गरिएको थियो । त्यसैगरी प्रतियोगिताको उत्कृष्ट खेलाडी देबेन्द्र तामाङ(शनिश्चरे), फाइनल खेलका उत्कृष्ट खेलाडी निमा तामाङ(शनिश्चरे), उत्कृष्ट गोलरक्षक अनुप तामाङ(शनिश्चरे), उत्कृष्ट रक्षक पेमा तामाङ(शनिश्चरे), उत्कृष्ट मिडफिल्डर सौगात गोम्देन(शनिश्चरे), उत्कृष्ट फरवार्ड रोमन भुजेल(बुट्टाबारी), सर्वोत्कृष्ट गोलकर्ता निमा तामाङ(शनिश्चरे), उत्कृष्ट प्रशिक्षक तुसार प्रधान(शनिश्चरे) र उदीयमान खेलाडी सिद्धान्त लिम्बू(आयोजक) घोषित भएका छन् । उनीहरुलाई नगद पुरस्कारसहित ट्रफी प्रदान गरिएको थियो ।
प्रतियोगिताका विजेता, उपविजेता र विभिन्न विधाका उत्कृष्ट खेलाडीहरुलाई प्रमुख अतिथि राष्ट्रिय सभा सदस्य देवेन्द्र दाहाल, अर्जुनधारा नगरपालिकाकी उपप्रमुख खड्गमाया पराजुली, वडाध्यक्षद्वय खगेन्द्र इङनाम र हरिशचन्द्र बाँस्तोला, झापा जिल्ला फुटबल संघका अध्यक्ष भगिरथ आले, राष्ट्रिय कलाकार विल्सनविक्रम राई, चलचित्र निर्देशक उदय सुब्बालगायतले पुरस्कार वितरण गरेका थिए ।
