झापा, कात्तिक २३ । झापाको प्रसिद्ध धार्मिकस्थल कनकाई नगरपालिका –४ स्थित कनकाई धाम (कोटीहोम) को माई खोला किनारमा आजदेखि विश्व–शान्ति विराट महायज्ञ महाअनुष्ठान शुरु हुँदैछ ।
![](https://pratidindaily.com/wp-content/uploads/2023/11/398991297_2969132879885701_4705320885054108397_n-1-1024x768.jpg)
ऊँ आदी फाउन्डेसनको आयोजनामा आजदेखि २५ गतेसम्म महाअनुष्ठान सञ्चालन गरिने आयोजक समितिले जनाएको छ । विश्व बसुधामा शान्ति स्थापनार्थ परमपुज्य बालब्रम्हाज्ञानी गुरु आदिचन्द्र योगीद्वारा परिकल्पित अलौकिक एवम् अद्रुत आध्यात्मिक विधिका साथ आयोजना हुने ऐतिहासिक महायज्ञ महाअनुष्ठानमा स्वस्तिक आकृतिभित्र स्थापित गरिने भव्य यज्ञ मण्डपमा विशिष्ट याज्ञिक एवम् साधानात्मक विधि प्रक्रियाहरूका साथ १०८ दिव्य हवनकुण्डमा सयौँ साधकहरूको सहभागिता रहने जनाइएको छ । स्वस्तिक आकृतिभित्र ऊँ, शिव लिङ्ग, महाकाली र त्रिशूल चार दिशामा राखिएको छ ।
![](https://pratidindaily.com/wp-content/uploads/2023/11/400851184_6985360138186921_5959852908126514399_n-1024x768.jpg)
आज बिहान देवीदेवताको प्रतिमा स्थापना गरी सुरु हुने महाअनुष्ठान राति १२ बजेसम्म तन्त्र साधनाका साथ सम्पन्न हुनेछ । त्यस्तै कात्तिक २४ गते बिहान ६ बजे नित्य पूजाबाट पुनः सुरु हुने महाअनुष्ठान राति १२ बजे विशेष कर्मका साथ सम्पन्न हुनेछ । अन्तिम दिन कात्तिक २५ गते बिहान ६ बजे नित्य पूजाबाट सुरु हुने महाअनुष्ठान दिउँसो ३ बजे समापन हुने आयोजक समितिले जनाएको छ ।