दमक,मंसिर ७ । झापा कमल ६ का अनिल कार्कीको मृत्यु प्रकरणमा पक्राउ परेका सो वडाका वडाध्यक्ष नरेन्द्र भट्टरार्ईसहित तीन जना धरौटीमा रिहा भएका छन् ।
आत्महत्या दुरुत्साहनको मुद्धामा किटानी जाहेरी परेपछि पक्राउ परेका वडाध्यक्ष भट्टराई ८० हजार तथा मृतक कार्कीकी पत्नी चाहना पोखरेल र ससुरा पुण्यप्रसाद पोखरेल जनही डेढ लाख रुपैयाँका दरले धरौटी राखेर रिहा भएका हुन् ।
झापा जिल्ला अदालतका न्यायाधीश भिमबहादुर निरौलाको इजलासमा बुधबार भएको थुनछेक बहसपछि सो आदेश भएको झापा जिल्ला अदालतका स्रेस्तेदार किरण सिंहले जानकारी दिए । अदालतले तोेकेको धरौटी बुधबार नै सम्बन्धित व्यक्तिहरुबाट दाखिला भएको उनले बताए । धरौटी बुझाएसँगै उनीहरु रिहा भएको इलाका प्रहरी कार्यालय दमकले बताएको छ ।
कमल ६ स्थायी घर भई जिल्ला वन कार्यालय पाँचथरमा कार्यरत कार्की गएको दशैं बिदामा घर आएको समयमा महानवमीको दिन पारिवारिक विवाद हुँदा वडाध्यक्ष भट्टराई , कार्कीकी पत्नी चाहना र ससुरा पुण्यप्रसाद पोखरेलले कुटपिट गरेको र सोही कारण उनले दशैंको अन्तिम दिन आत्महत्या गरेको आरोप लागेको हो । कार्कीका बहिनी, मामालगायत उनका शुभचिन्तकहरुले कार्कीले न्याय नपाई मर्नु परेको भन्दै न्यायको मागसहित दमकमा उनको शवसहित प्रदर्शन गरेका थिए भने इलाका प्रहरी कार्यालय दमकमा उनीहरुविरुद्ध किटानी जाहेरी दिएका थिए ।
प्रहरीले वडाध्यक्ष भट्टराईसहित घटनामा जोडिएका सबैलाई अनुसन्धानको दायरामा ल्याउने प्रतिबद्धता जनाएपछि मात्रै कार्कीको शव बुझेका थिए ।
