झापा, मंसिर १२ । मेची राजमार्ग अवरुद्ध पार्नेक्रममा पहिचानवादीहरुले आगजनी र तोडफोड गरेका छन् ।
शान्तिनगरको सुनमाईमा ना २ ख ९७२२ नं को मालवाहक ट्रकमा बन्दकर्ताहरुले आगजनी गरेका हुन् । तत्काल प्रहरी टोली आइपुगेकाले आगजनी गरेर बन्दकर्ताहरु भागेको र आगो निभाएको जनाइएको छ । त्यस्तै बन्दकर्ताहरुले मेची राजमार्गको झापा खण्डमा एउटा सवारीसाधनमा तोडफोड गरेको प्रहरीले जनाएको छ । प्रहरीले स्कर्टिङ गरेर यातायातका साधनहरुलाई गन्तव्यतर्फ पुर्याएको थियो ।
दुई दिनअघि नेकपा एमालेका सचिव एवं प्रतिनिधिसभाका सांसद योगेशकुमार भट्टराईको गाडी तोडफोड गर्दा पक्राउ परेकाहरुको रिहाईका लागि दबाब दिन पहिचानवादीहरुले मेची राजमार्गमा चक्काजाम गरेका थिए । कोशी नामविरुद्व आन्दोलन गरिरहेको प्रदेश १ पुनःनामांकन संयुक्त संघर्ष समितिले आह्वान गरेको बन्दका कारण दिनभर मेची राजमार्गमा यातायात ठप्प भएपछि अलपत्र परेका यात्रुलाई गन्तब्यमा लैजान प्रहरीले स्कर्टिङ गरेको थियोे ।
आइतवार ताप्लेजुङबाट काठमाडौं फर्कने क्रममा सदरमुकाम फुङलिङको बसपार्कनजिकै पहिचान पक्षधरले भट्टराईको गाडीमाथि आक्रमण गरेका थिए । सात–आठ जनाको समूहमा रहेकाहरुले भट्टराई सवार गाडीमा ढुंगा र लाठीले हानेका थिए । त्यसक्रममा विपिन कङ्लिवा लिम्बू र आनन्द कङ्लिवा पक्राउ परेका छन् ।
