झापा, मंसिर १३ । ताप्लेजुङमा पक्राउ परेका दुई जना कार्यकर्ता रिहा भएपछि दुई दिनदेखिको मेची राजमार्ग र ताप्लेजुङ बन्द फिर्ता भएको छ ।
आइतवार ताप्लेजुङबाट काठमाडौं फर्कने क्रममा सदरमुकाम फुङलिङको बसपार्कनजिकै पहिचान पक्षधरले नेकपा एमालेका सचिव तथा संघीय सांसद योगेश भट्टराईको गाडीमाथि आक्रमण गरेका थिए ।
सात–आठ जनाको समूहमा रहेकाहरुले भट्टराई सवार गाडीमा ढुंगा र लाठीले हानेका थिए । त्यसक्रममा विपिन कङ्लिवा लिम्बू र आनन्द कङ्लिवा पक्राउ परेका थिए ।
कोशी नाम खारेजी र पक्राउ परेका कार्यकर्ता रिहाइको लागि भन्दै संयुक्त संघर्ष समितिको आयोजनामा मंसिर १२ र १३ गते मेची राजमार्ग र ताप्लेजुङ बन्द भएको थियो ।
बुधबार साँझ ताप्लेजुङ संयुक्त संघर्ष समिति, जिल्ला प्रशासन, प्रहरी र विभिन्न पार्टीको सहमतिपछि पहिचानवादी कार्यकर्ताहरु रिहा भएका छन् । रिहाइपछि आजैबाट मेची राजमार्ग र ताप्लेजुङ बन्द फिर्ता लिएको संयुक्त संघर्ष समितिले विज्ञप्ति प्रकाशन गरी जनाएको छ ।
